Kong pơlê Dak Lak ai 49 hdroâng kuăn ngo rêh ối, pơ’leăng mâ mơngế lối 2 rơtuh ngế, tung mê kuăn pơlê hdroâng kuăn ngo châ dâng 34%. Pơla hơnăm 2021 – 2025, kong pơlê Dak Lak châ Tơnêi têa axoăng vâ chê 5.600 rơtal liăn, kong pơlê xuân xiăng xoăng lối 1.400 rơtal vâ pro 3 tơdroăng pơkâ dêi tơnêi têa.

Kơxô̆ liăn ki ‘no pêi cheăng ki kal kố hiăng pro ngiâ méa nếo kơpong hdroâng kuăn ngo, hngêi trăng, troăng klông châ ‘no liăn pro tơdâng tơ’mô, pêi lo liăn dêi rêm ngế kuăn pơlê châ mơdêk hên, kơxô̆ rơpŏng kơtiê hiăng rế chu kơdroh. Hneăng hôp khu kăn mâu hdroâng kuăn ngo kong pơlê Dak Lak rôh má 4 mơ’no mâu tơdroăng pêi ki kal, mê cho: hơnăm 2029 rêm ngế kuăn pơlê pêi lo liăn tâk ing 1,5 troh 2 xôh tâng vâ pơchông ƀă nôkố, kơxô̆ rơpŏng kơtiê kơpong hdroâng kuăn kơdroh ing 3 – 4%/hơnăm, mơ-eăm troh hơnăm 2030 ah kô ôh tá ai xếo tơring kơtiê, cheăm malối xơpá.