A rôh leh lăm pôu ngăn têk nhang a ilâng kiâ ‘mé mâu hlâ ai hnoăng, Khu kăn cheăng dêi Kăn xiâm phŏ hnê ngăn tơnêi têa rơtế ƀă mâu kăn kong pơlê Quảng Trị mơhno tuăn pâ khât kơ mâu ngế hlâ tơplâ khên tơnôu hiăng tơplâ ta troh  hlâ vâ kring vế Tơnêi têa. Jâ Võ Thị Ánh Xuân, Kăn xiâm phŏ hnê ngăn tơnêi têa hiăng lăm pôu, hbru tơmeăm ăm jâ Lê Thị Mót cho  Jâ nôu Việt Nam khên tơnôu ối a cheăm Gio Sơn, tơring Gio Linh; lăm ngăn rơpŏng hngêi pôa Nguyễn Khiếm ối a bêng 1, pơlê kong kơdrâm Đông Hà; diâp 60 kơxu tơmeăm ăm mâu rơpŏng ai hnoăng tơnêi têa, Jâ Nôu Việt Nam khên tơnôu, rơpŏng ai hnoăng kăch măng a tơring Triệu Phong. 

Jâ Võ Thị Ánh Xuân, Kăn xiâm phŏ hnê ngăn tơnêi têa tơpui tơno, kơ-êng, mơhno hiâm mơno pâ kơ mâu ai hnoăng, hiăng ‘no cheăng pá puât dêi Jâ Nôu Việt Nam khên tơnôu xuân môi tiah mâu  rơpŏng mơngế ai hnoăng ƀă kăch măng ƀă nôu pâ on veăng nhŏng o mơngế ki hlâ ai hnoăng tơnêi têa.