Tiô tối tơbleăng dêi ƀơrô cheăng Kuô̆k hô̆i, 6 khế apoăng hơnăm, hnoăng cheăng tí tăng ‘nâi plĕng, cheăng gum tơbleăng mâu tơdroăng cheăng mơjiâng luât pơtối cho tơdroăng ki châ kơjo pêi pro ahdrối, tơtrŏng, mơdêk ki rơkê plĕng. Klêi kơ’nâi 4 hneăng hôp, Kuô̆k hô̆i hiăng tơbleăng 13 luât, 3 tơdroăng pơkâ ‘na luât, ăm rơkong veăng tơpui tối ‘na 11 kơxop hlá mơ-éa luât ki ê; malối, hdró tơdroăng ki xiâm ‘na hnoăng cheăng mơjiâng luât apoăng hơnăm 2024.

Tơpui a rôh hôp, pôa Trần Thanh Mẫn, Kăn xiâm hnê ngăn Kuô̆k hô̆i tối nhên, 6 khế apoăng hơnăm, tơnêi têa pin pêi klêi hên mâu tơdroăng ki kal, tung tơdroăng ki pêi pro tơƀrê tơdjuôm mê ai ivá veăng gum kal khât dêi Kuô̆k hô̆i, Vi ƀan pơkuâ Kuô̆k hô̆i. Tung mê, hnoăng cheăng mơjiâng luât, séa ngăn khât ƀă pơkâ mâu tơdroăng ki kal pơtối châ mơdêk ‘na ki rơkê, tro, ‘ló mâu tơdroăng ki châ kuăn pơlê kal vâ ‘nâi.

Tung tơdroăng mê, Pôa Trần Thanh Mẫn, Kăn xiâm hnê ngăn Kuô̆k hô̆i khê̆n kơdeăn tơdroăng ki mơ-eăm, ivá veăng ‘no dê Hô̆i đong Hdroâng kuăn ngo, mâu Vi ƀan, kơ koan cheăng dêi Kuô̆k hô̆i ƀă tâi tâng kăn ƀô̆, kong chưk, viên chưk hiăng pêi klêi hên mâu tơdroăng cheăng a mâu hneăng hôp tiah hmâ dêi Kuô̆k hô̆i.

Pôa Trần Thanh Mẫn, Kăn xiâm hnê ngăn Kuô̆k hô̆i pơkâ thế, mâu ngế cheăng tung Vi ƀan pơkuâ Kuô̆k hô̆i, Hô̆i đong Hdroâng kuăn ngo, mâu kơ koan dêi Kuô̆k hô̆i ƀă hiâm mơno ngăn tơdrăng tung tơdroăng ki ai khat, tơpui tơdrăng mâu tơdroăng ki tá hâi pêi pro klêi vâ ‘mâi rơnêu, tơdrêng amê hlối ngăn hlo mâu tơdroăng pêi tơƀrê vâ pơtối mơnhông tung la ngiâ.

Kăn xiâm hnê ngăn Kuô̆k hô̆i tối nhên, hnoăng cheăng 6 khế apoăng hơnăm gá hên, malối cho hbrâ ăm hneăng hôp má 8, Kuô̆k hô̆i hneăng 15 tiô tối hdrối kô po a khế 10; tơkŭm po Rôh hôp khu kăn pơkuâ rôh má 6; tơbleăng tơƀrê mâu tơdroăng ki kal, tơdroăng cheăng dêi dêi 3 hneăng dêi Đảng đoân Kuô̆k hô̆i, Khu kăn pơkuâ Kuô̆k hô̆i; mâu rôh hôp dêi V ƀan pơkuâ Kuô̆k hô̆i.

“Pin tơkŭm tơbleăng tơdroăng ki xiâm tung tơdroăng mơjiâng luât, luât pơkâ dêi hơnăm 2024 châ ‘mot tơ’nôm cho rak vế tơdroăng mơjiâng bro, tiô pơkâ Kuô̆k hô̆i hiăng ‘mot tơ’nôm a tơdroăng mơjiâng luât, luât pơkâ dêi hơnăm 2024, mâu tơdroăng tơkêa luât hiăng hbrâ rơnáu nhên tŭm hồ sơ mê kal rĕng vâ tơmâng, ‘mâi rơnêu mâu tơdroăng pơkâ hiăng châ tơbleăng a hneăng hôp má 7. Mâu kăn xiâm phŏ hnê ngăn pơkuâ kô hnê mơhno séa ngăn ai to lâi mâu tơdroăng kal ki tá hâi tơbleăng kĭ mơnhên vâ pro klêi”.

Kăn xiâm hnê ngăn Kuô̆k hô̆i ăm ‘nâi, la ngiâ ah, Vi ƀan pơkuâ Kuô̆k hô̆i ƀă Chin phuh kô rơtế tơkŭm po Rôh hôp tơbleăng luât, luât pơkâ hiăng châ tơbleăng. Malối, Chin phuh kô pơkuâ po tơdroăng hnê tối, hnê hriâm luât vâ tơbleăng mâu luât, mâu Pơkâ, Tơdroăng pơkâ ki ê ăm tơdâng tơ’mô.

Kăn xiâm hnê ngăn Kuô̆k hô̆i pơkâ thế, Ƀơrô cheăng Kuô̆k hô̆i tí tăng ‘nâi plĕng ăm Vi ƀan pơkuâ Kuô̆k hô̆i hnê mơhno, séa ngăn, mơjiâng túa pơkâ vâ hlá mơ-éa châ pơkâ nhên, hnê mơhno pêi pro tơdroăng kal tiô hnoăng pơkuâ, pơtối hriăn ngăn, tơpui tối leăng, tơmâng xo, ‘mâi rơnêu 11 kơxop hlá mơ-éa luât hiăng châ Kuô̆k hô̆i ăm rơkong veăng tơpui tối a hneăng hôp má 7 ƀă kô tơbleăng a hneăng hôp má 8; hbrâ tơdroăng ki Kuô̆k hô̆i châ ‘mot tơ’nôm tung tơdroăng mơjiâng luât, luât pơkâ hơnăm 2024; tí tăng ‘nâi plĕng, gum cheăng tơkŭm po rôh êng a rôh hôp khế 8; tơkŭm pêi pro klêi hlá mơ-éa tối tơbleăng klêi kơ’nâi séa ngăn 2 tơdroăng pơkâ ‘na tơdroăng kal dêi Vi ƀan pơkuâ Kuô̆k hô̆i tung hơnăm 2024.

Pôa Trần Thanh Mẫn - Kăn xiâm hnê ngăn Kuô̆k hô̆i xuân pơchân, kal thăm mơdêk hnoăng cheăng pơkuâ ngăn tơdroăng kal kí ăm mâu đảng viên, kăn ƀô̆, kong chưk, viên chưk; malối tơmâng ngăn troh mâu troăng hơlâ tŏng gum, liăn khế ƀă bro tơdâng tơ’mô, tơtro ƀă teăm tơdrêng.