Hâi lơ 8/8, a Hneăng hôp mơnhên tơdroăng châ tơƀrê tơdroăng mơhnhôk, pơtâng tối ki má môi hơnăm 2022 – 2023 ƀă pêi pro hnoăng cheăng tung hneăng pơtối. Ƀinh đoân 15 hiăng tơkŭm po kheăn kơdeăn 104 ngế krâ pơlê, kăn pơkuâ thôn, ngế ki kuăn pơlê loi tơngah hdroâng kuăn ngo a kơpong tơkăng kong 2 kong pơlê Gia Lai ƀă Kon Tum.

Tung 2 hơnăm hiăng hluâ, Ƀinh đoân 15 hiăng pêi pro lĕm tro tơdroăng pơtâng tối, veăng kum pêi pro lĕm tro hnoăng cheăng kâ gâk kring tơnêi têa, tơniăn gâk kring a kơpong tơkăng kong mâu kong pơlê Gia Lai, Kon Tum. Ki nhên, Ƀinh đoân hiăng tăng cheăng pêi tơniăn ăm 9 rơpâu ngế pêi cheăng hdroâng kuăn ngo; tơkŭm po lối 4.200 tơpéa rơpŏng kŏng nhên mơngế Xuăn ƀă mơngế hdroâng kuăn ngo rŭm, kum dêi pó mơnhông cheăng kâ.

Rơtế ƀă mâu tơdroăng tuăn pâ, Ƀinh đoân 15 hiăng mơnhông hnoăng dêi mâu krâ pơlê, kăn pơkuâ thôn, ƀok xối, yah chĭng, mâu ngế ki kuăn pơlê loi tơngah tung kơpong hdroâng kuăn ngo, veăng kum tŏng kum tơdroăng rêh ối hiâm mơno, rak vế khôi túa lĕm tro ƀă tơniăn gâk kring kơpong tơkăng kong.