Tung 235 rơpŏng kuăn pơlê nôkố dế rêh ối a kơpong ối kreăng troăng tơkăng kong, kuăn pơlê pơla cheăm Đăk Nên, tơring Kon Plông, kong pơlê Kon Tum ƀă cheăm Trà Vinh, tơring Nam Trà My, kong pơlê Quảng Nam mê ai troh lối tơdế kơxô̆ rơpŏng ối tung rơpŏng kơtiê. Xua kreăng troăng tơkăng kong, kuăn pơlê hiăng ôh tá châ mơ’no liăn mơjiâng mâu tơmeăm khoăng ki kal xúa rêm hâi môi tiah on tơhrik, troăng kân, hngêi trung hriâm, ôh tá pro ăm mơ-éa tơnêi... xua mê lôi hên roh tơ’lêi hlâu mơnhông pêt mơjiâng tơmeăm pro kum tung tơdroăng rêh ối.

Pôa Phan Quốc Vũ, Kăn pơkuâ gâk ngăn kong rak kơnhŏng têa, tơnêi, kong prâi Thạch Nham, kong pơlê Kon Tum, tối ăm ‘nâi, tíu cheăng pói vâ pơcháu kong ăm kuăn pơlê, pơlê pơla pơkuâ gâk ngăn kong, laga xua kong cho dêi kong pơlê Kon Tum ƀă kuăn pơlê xua kong pơlê Quảng Nam pơkuâ xua mê ôh tá chiâng vâ pơcháu kong. Xua mê kuăn pơlê, pơlê pơla ôh tá châ pơcháu kong vâ ai tơ’nôm pêi lo liăn ƀă khu gâk ngăn kong pơtối trâm hên pá puât tung tơdroăng pơkuâ:

“Tơdroăng pơkuâ gâk ngăn kong kơpong kố cho pá puât. Tơdroăng rêh ối mê kố cho kơpong tá hâi ai on tơhrik vâ xúa xuân môi tiah hyôh phôn ƀă mâu hngêi trăng troăng, klông xuân tá hâi ai xua mê pá puât tung tơdroăng rêh ối, kâ ối dêi khu gâk ngăn kong. Kơpong kô cho tíu tơkăng kong tơnêi têa, kong ối tung kong pơlê Kon Tum pơkuâ laga kuăn pơlê mê kong pơlê Quảng Nam. Tíu cheăng pá puât má môi cho tơdroăng pơtâng tối mơhnhôk kuăn pơlê pơkuâ gâk ngăn kong’’.

Nôkố, a kơpong ki kreăng tơkăng kong, kuăn pơlê pơla cheăm Đăk Nên, tơring Kon Plông, kong pơlê Kon Tum ƀă cheăm Trà Vinh, tơring Nam Trà My, kong pơlê Quảng Nam, ôh tá ai tơmeăm khoăng hngêi trăng, troăng klông ki lâi châ mơ’no liăn cheăng ing kơxô̆ liăn tơnêi têa. Tơdroăng kố pro tơdroăng rêh ối dêi kuăn pơlê hiăng pá mê thăm pá puât tâ mê nếo. Jâ Y Thị, Kăn phŏ hnê mơhno má môi tơdroăng cheăng Đảng tơring Kon Plông, kong pơlê Kon Tum, tối ăm ‘nâi:

“Tơdroăng kal vâ mơ’no liăn cheăng tơleăng mâu tơdroăng pá puât tung tơdroăng rêh ối kuăn pơlê xuân môi tiah mơ’no liăn mơjiâng pro hngêi trăng, troăng klông ƀă mâu tơmeăm kum rêh ối pơlê pơla cheăm Trà Vinh, tơring Nam Trà My ôh tá chiâng vâ tơleăng xua luât ôh tá ăm phêp pêi pro mơ’no liăn cheăng pakong tơkăng kong tơnêi têa. Klêi kơ’nâi hên xôh khu râ kăn pơkuâ 2 cheăm Đăk Nên – Trà Vinh ƀă 2 tơring Kon Plông – Nam Trà My pêi cheăng laga kreăng ôh tá chiâng vâ tơleăng ôh’’.

Drêng tơdroăng rêh ối pá puât dêi 235 rơpŏng, vâ chê 1.100 ngế kuăn pơlê a kơpong kreăng, plâ 3 hơnăm hiăng hluâ, hên roh hôp pơla kơvâ cheăng ƀă khu râ kăn pơkuâ mâu râ 2 kong pơlê Kon Tum ƀă Quảng Nam hiăng tơkŭm po laga kreăng xuân ôh tá chiâng tơleăng xua 2 pâ ôh tá châ môi tuăn. Pôa Đặng Quang Hà, Kăn hnê ngăn Vi ƀan tơring Kon Plông, kong pơlê Kon Tum, pâ thế:

“Pói vâ cho khu râ kăn ai hnoăng rĕng séa ngăn, tơleăng tơdroăng ki kreăng tơkăng kong tơnêi têa hiăng ai sap ing ton nah. Ing mê, mâu kong pơlê ai liăn mơ’no mơjiâng pro hngêi trăng, troăng klông, rak ngăn tơdroăng rêh ối kuăn pơlê, tơniăn ăm kuăn pơlê mâu tơdroăng ‘na tơnêi tơníu, ‘na hngêi ối, ‘na pêt mơjiâng tơmeăm pêi lo ing chiâk deăng ing mê kuăn pơlê ai tơdroăng rêh ối tơniăn, tơdroăng rêh ối lĕm tro tâ’’.

Klêi kơ’nâi hên roh trâm mâ pơla péa pâ, kong pơlê Quảng Nam xuân rak troăng tơmiât pêi vâ rak pơ’leăng mơngế dêi kuăn pơlê ƀă pơhlêh tơkăng kong Kon Tum ngi peăng dêi tơná. Tơrôu ki mê kong pơlê Kon Tum tối kal rak lôi tiah mê tơkăng kong tơnêi têa ƀă kô chiâng pơhlêh pơ’leăng mâ mơngế vâ chê1.100 ngế ing Quảng Nam chiâng Kon Tum. Thăm nếo hơnăm 2023, 2 kong pơlê môi tuăn mơjiâng 2 tôh tơkŭm séa ngăn tâi tâng kơpong kố, tơdrêng amê ăm mơ-éa phĭu tơmâng xo rơkong kuăn pơlê ƀă 2 troăng ‘’pơhlêh tơkăng kong tơnêi têa ƀă pơhlêh mâu mơ-éa chêh tơdroăng kal rơpŏng, pơ’leăng mâ mơngế’’.

Klêi séa ngăn tung 2.240 ngế kuăn pơlê châ pơtroh ăm phiu tơmâng xo rơkong ai 882 ngế, châ lối 37% pơkâ thế pơhlêh tơkăng kong tơnêi têa pơla 2  kong pơlê; 1.358 ngế, châ lối 60% pơkâ thế pơhlêh mơ-éa chêh tơdroăng kal rơpŏng, pơ’leăng mâ mơngế kuăn pơlê cheăm Trà Vinh, tơring Nam Trà My dế rêh ối tung kơpong ki kreăng tơkăng kong, chiâng kuăn pơlê ‘na peăng Kon Tum. Laga troh nôkố tơdroăng séa ngăn ki rơkê pơla 2 kong pơlê xuân tá hâi châ pêi pro. Kon Tum ƀă Quảng Nam xuân tá hâi môi tuăn ƀă kuăn pơlê xuân pơtối rêh ối ôh tá ai tŭm tơmeăm khoăng, trâm hên pá puât.