Tung kơxô̆ vâ chê 40 rơkong tơpui tối dêi kuăn pơlê a rôh trâm mâ kuăn pơlê, ki hên cho tối troh tơdroăng ki tơbriât tơnêi pơla kuăn pơlê ƀă mâu kŏng ti, khu mơdró kâ châ Tơnêi têa pơcháu ăm tơnêi. Tiô kuăn pơlê, tơdroăng ki tơxup tơbriât tơnêi kố hiăng ton lối chât hơnăm kố la xuân tá hâi châ tơmâng ngăn tơleăng klêi. Kuăn pơlê Nguyễn Hữu Tân, teăng mâ lối 60 rơpŏng kuăn pơlê a thôn Hiệp Hòa, cheăm Ninh Gia, tối:

“Hâi lơ 29/8/1988, Vi ƀan hnê ngăn kong pơlê pơcháu pơtân ăm Tíu xiâm mơdâ pro hdrê pêt Lâm nghiệp Lang Hanh cho 200 ha la tung mê ai tơnêi dêi vâi krâ nhŏng o ngin dế pêi. Tung pơkâ a troăng 3 tối nhên, ƀă kơxô̆ tơnêi dêi vâi krâ nhŏng o dế pêi mê pâ thế rêm râ, mâu kơvâ cheăng tơleăng tiô luât pơkâ, la ing mê troh nôkố ôh tá hlo tơleăng. Vâi krâ nhŏng o ngin pâ thế ing cheăm troh a tơring, ing tơring troh a kong pơlê, mê nếo ing kong pơlê vâi tơvêh pơtroh ăm cheăm”.

Hlo mâu tơdroăng ki tơdjâk troh pơkuâ ngăn, xúa ƀă tơbriât tơnêi tơníu a cheăm Ninh Gia ôh tá tơniăn ƀă hiăng ton, pôa Phan Đình Trạc, Ngế cheăng Khu xiâm kal kí, Ngế pơkuâ ngăn xiâm Đảng, Ngế xiâm pơkuâ cheăng Tơnêi têa pơkâ thế kăn pơkuâ kong pơlê Lâm Đồng rĕng séa ngăn, pơkâ tơleăng klêi tiô rêm kơ tơdroăng. Ƀă mâu tơdroăng ki xiâm ối tung hnoăng pơkuâ, Khu kăn Kuô̆k hô̆i kong pơlê Lâm Đồng kô ai hlá mơéa pâ thế Khu xiâm pơkuâ ngăn lêng veăng tơleăng. Pôa Phan Đình Trạc, tối:

 “Tơdroăng ki tơdjâk troh tơnêi tơníu, á pâ thế pôa Nguyễn Ngọc Phúc, kăn phŏ hnê ngăn Vi ƀan kong pơlê, Khu kăn kế tơmeăm tung têa, a tơnêi ƀă hyôh kong prâi rơtế ƀă mâu vâi pú ki ai mâ akố hnê mơhno tŏng gum nhên rêm tơdroăng. Vâi krâ nhŏng o tối cho êng tơring mê tơring tối kong pơlê tá hâi ai rơkong tơpui tối, ƀă kong pơle mê tối ối tung hnoăng pơkuâ dêi tơring, mê hmếo pơ tơpui tối ăm dêi rơpó môi tiah kố vâi krâ nhŏng ôh tá ‘nâi thế kơbố. Krê ‘na tơnêi ki tơdjâk troh Nông Lâm trường 78 mê á pâ thế Ƀơrô cheăng chêh pro hlá mơéa dêi Khu kăn Kuô̆k hô̆i kong pơlê tối tơbleăng tro tâi tâng mâu tơdroăng nôkố dêi nông lâm trường vâ pơtroh ăm Khu xiâm pơkuâ ngăn lêng, vâi lăm troh akố pơkuâ po, tơrŭm ƀă kong pơlê, ƀă Học viện Lục quân vâ pơkâ tơleăng klêi hlối”.

Hdrối mê, a cheăm Trạm Hành, pơlê kong kơdrâm Đà Lạt, pôa Phan Đình Trạc, Ngế cheăng tung Khu xiâm kal kí, Kăn pơkuâ ngăn xiâm Đảng, Ngế xiâm pơkuâ cheăng tơnêi têa rơtế ƀă Khu kăn Kuô̆k hô̆i kong pơlê Lâm Đồng hiăng trâm kuăn pơlê ƀă kŏng nhân pêi cheăng ƀă kăn ƀô̆, đoàn viên kong đoàn.

A rôh trâm kuăn pơlê, hên kuăn pơlê tối tiah kố khu ki pơkuâ rak ngăn kong cho mâu ngế cheăng ki kal pêi pro mâu hnoăng cheăng tơdrêng am tíu vâi pêi cheăng, la khu kố tá hâi châ tơmâng ngăn ƀă ôh tá châ ngăn cho kơvâ cheăng ki hngăm, rơ-iêo môi tiah khu rak ngăn loăng pơlái kuăn kiâ kong. Kuăn pơlê pâ thế athế séa ngăn, ‘mâi rơnêu túa pơkâ ‘na troăng tŏng gum kố vâ rak vế tơniăn hnoăng pơxúa ăm khu ki rak ngăn kong a cheăm pơlê – tíu ki ai kơxô̆ kong xâp rơngiâp châ lối tơdế ƀăng tơnêi dêi tung lâp kong pơlê.

Tơpui a rôh trâm kuăn pơlê, pôa Phan Đình Trạc, Ngế cheăng tung Khu xiâm kal kí, Kăn pơkuâ ngăn xiâm Đảng, Ngế xiâm pơkuâ cheăng Tơnêi têa ăm ‘nâi tiah kố mâu rơkong tơpui, pâ thế dêi kuăn pơlê cho tơtro khât. Khu kăn Kuô̆k hô̆i kong pơlê Lâm Đồng kô tơmâng xo, chêh ‘măn ƀă tối tơbleăng ăm mâu kơ koan râ Tơnêi têa.

“Tơdroăng ki khu pơkuâ rak ngăn kong tá hâi châ xoăng cho kơvâ ki ‘mêi, rơ-iêo môi tiah khu rak ngăn loăng pơlái kuăn kiâ kong la tơdroăng cheăng pêi dêi vâi ôh tá phá klâi mâu ngế ki rak ngăn loăng pơlái kuăn kiâ kong, tơdroăng kố á pâ thế Khu kăn Kuô̆k hô̆i kong pơlê Lâm Đồng tơmâng xo vâ tơbleăng ăm Chin phuh. Pakĭng mê, mâu tơdroăng ‘na khăm pơlât, hnê hriâm, kong đoàn, cheăng pêi ƀă hên ki ê ngin kô tơmâng xo nhên vâ tơbleăng ăm rêm râ a Tơnêi têa”.

Drêng kố, Khu kăn Kuô̆k hô̆i kong pơlê Lâm Đồng hiăng diâp 20 kơxuô tơmeăm ăm rơpŏng ki châ tơnêi têa tŏng gum, ngế ki ai hnoăng, ngế ki ai tơdroăng rêh ối pá puât a cheăm Trạm Hành, pơlê kong kơdrâm Đà Lạt, 20 kơxuô tơmeăm diâp ăm rơpŏng châ tơnêi têa gum, ngế ki ai hnoăng, ngế ki ai tơdroăng rêh ối pá puât a cheăm Ninh Gia, tơring Đức Trọng, kong pơlê Lâm Đồng.