Hnoăng cheăng ‘na mâu ngế pêi cheăng hiăng châ pêi pro krá tơniăn tiô tro pơkâ dêi Đảng, luât Tơnêi têa, châ tơdroăng ki môi tuăn hên khât dêi mâu kăn Kuô̆k hô̆i. Kuô̆k hô̆i hiăng tơbleăng Pơkâ ‘na tơdroăng kĭ pơkâ pôk Ngế pro xiâm hnê ngăn ƀă 432/432 kăn Kuô̆k hô̆i ai mâ môi tuăn. 3 ngế pêi cheăng châ kĭ pôk pro Ngế pro xiâm phŏ hnê ngăn, mê cho: Pôa Nguyễn Hòa Bình, Ngế xiâm ngăn Tơdroăng kal kí, pôa Hồ Đức Phớc, ngế cheăng tung khu xiâm tơnêi têa, ngế xiâm ngăn liăn ngân ƀă pôa Bùi Thanh Sơn, Ngế cheăng tung tíu xiâm Tơnêi têa, Ngế xiâm tơpui kâ. Pôk pôa Nguyễn Hải Ninh, Ngế xiâm pơkuâ Khu xiâm mơjiâng luât ƀă pôa Đỗ Đức Duy, ngế xiâm ngăn tơmeăm khoăng tung têa, a tơnêi ƀă hyôh kong prâi.

Tơpui mơgêi a hneăng hôp, teăng mâ Kuô̆k hô̆i, Vi ƀan pơkuâ Kuô̆k hô̆i, Kăn xiâm hnê ngăn Kuô̆k hô̆i pôa Trần Thanh Mẫn mơnê tơdroăng pơkuâ rơkê dêi Khu pơkuâ ngăn tíu xiâm Đảng, Khu xiâm pơkuâ tơdroăng kal kí, Khu pơkuâ ngăn Đảng, ngế ki tơdrêng cho pôa Tô Lâm, Kăn xiâm pơkuâ ngăn Đảng, Kăn xiâm hnê ngăn tơnêi têa tung pơla hbrâ rơnáu pêi pro ƀă Hneăng hôp. Mâu kăn Kuô̆k hô̆i hiăngt mơdêk hiâm mơno pôu râng, tơpui tơno tơniăn, khŏm pơkâ hnoăng cheăng mâu ngế pêi cheăng châ tơdroăng ki môi tuăn hên khât. Pôa Trần Thanh Mẫn, Kăn xiâm hnê ngăn Kuô̆k hô̆i tối nhên:

“Pin loi tơngah, xua tơdroăng pơkuâ dêi Đảng; tơdroăng ki veăng gum dêi tá khu pơkuâ tơdroăng kal kí, mâu khu râ, mâu kơvâ cheăng; tơdroăng ivá mơ-eăm dêi tâi tâng Đảng, tâi tâng kuăn pơlê, tâi tâng khu lêng, khu mơdró kâ, kuăn pơlê pin a kong têa ê, khŏm mơ-eăm ăm tơnêi têa pin kô tơkâ luâ pá puât, pơloăng mơnúa, pêi klêi mâu tơdroăng pơkâ vâ pêi mơnhông cheăng kâ rêh ối pơlê pơla, rak vế tơniăn tơdroăng cheăng lêng gâk kring, hnoăng cheăng tơpui kâ ƀă hbrâ mơdât kâ kơluâ liăn ngân dêi hơnăm 2024, veăng gum pêi pro ƀlêi chiâng Pơkâ Hneăng hôp khu kăn lâp tơnêi têa rôh má 13 dêi Đảng; hbrâ rơnáu Hneăng hôp Đảng ƀô̆ rêm râ, pêi pro troh Hneăng hôp khu kăn lâp tơnêi têa rôh má 14 dêi Đảng”.

Klêi kơ’nâi mơgêi Hneăng hôp, Bơrô cheăng Kuô̆k hô̆i tơkŭm po hôp tơbleăng, klêi kơ’nâi Hneăng hôp. Pôa Bùi Văn Cường, Ngế xiâm cheh tôm xo rơkong Kuô̆k hô̆i, Kăn pơkuâ Ƀơrô cheăng Kuô̆k hô̆i ăm ‘nâi: Hneăng hôp ôh tá tối hdrối rôh má 8, Kuô̆k hô̆i hneăng 15 hiăng ƀlêi chiâng tơniăn lĕm, mâu ngế cheăng tơlŭm pôk lơ kĭ pơkâ châ tơdroăng ki môi tuăn tơdroăng pôk hên khât:

“Kăn xiâm hnê ngăn tơnêi têa mê tung Pơkâ dêi Tơnêi têa khế 10 kố kô pôk. Ngế xiâm ngăn Liăn ngân kô hlối pro tá troh drêng kĭ pơkâ Ngế xiâm pơkuâ ki nếo. Ƀă Ngế xiâm tơpui kâ mê Ngế pro xiâm phŏ la pơtối pro Ngế xiâm pơkuâ Kơxô̆ ngế pơkâ dêi mâu ngế cheăng tung Chin phuh, apoăng hneăng mê Pơkâ dêi Kuô̆k hô̆i pơkâ ai 4 Ngế pro xiâm phŏ hnê ngăn, pơla hdrối kố nah Kuô̆k hô̆i môi tuăn ing 4 ngế pro Ngế pro xiâm phŏ hnê ngăn tơnêi têa hiăng ai 3 ngế kăn nếo châ kĭ pơkâ klêi chiâng 5”.

Ngế xiâm pơkuâ Khu pơkuâ tơdroăng cheăng khu kăn Nguyễn Thanh Hải xuân ăm ‘nâi: tiô tối hdrối dêi Tơnêi têa, ing nôkố troh tâi hơnăm 2024 kô tơkŭm séa ngăn mâu inâi kăn xiâm pơkuâ ƀă khu râ kăn Đảng, khu kăn pơkuâ rêm râ, vâ thăm mơdêk hnoăng cheăng pơkuâ dêi Đảng ƀă hnoăng cheăng mơnhông mơdêk cheăng kâ rêh ối pơlê pơla, túa lĕm tro, tơdroăng cheăng lêng, gâk kring, tơpui kâ ƀă hbrâ rơnáu ăm Hneăng hôp Đảng rêm râ pêi pro troh Hneăng hôp Đảng lâp tơnêi têa rôh má 14 dêi Đảng.

Tơdroăng ki séa ngăn mâu ngế pêi cheăng vâ rak tơniăn ăm khu pơkuâ tơdroăng kal kí tơniăn lĕm tâ; tơrŭm tâ; hơniâp lĕm tâ; pêi cheăng tơƀrê tâ ƀă pro tơ’lêi hlâu tâ, tơniăn tâ ăm mơnhông mơdêk cheăng kâ rêh ối; mơdêk tơdroăng rêh ối dêi kuăn pơlê; thăm mơdêk tơrŭm hmâ ƀă kuăn pơlê ‘mâi mơnhông hiâm mơno loi dêi kuăn pơlê ƀă Đảng ƀă Tơnêi têa.

“Kăn ƀô̆ nôkố châ xoăng tiô troăng tơmiât ai tâk, ai chu, ai mot, ai lo tiô pơkâ hnoăng cheăng, tơdroăng púi vâ pêi cheăng ƀă ivá pêi klêi hnoăng cheăng dêi rêm ngế krê ki nhên. Tơdroăng ki Kuô̆k hô̆i kĭ pơkâ 3 ngế Pro xiâm phŏ hnê ngăn tơnêi têa, 2 ngế xiâm pơkuâ hâi kố, tơbleăng mâu tơdroăng pơkâ hên khât lối 90% mơhno tơdroăng vâ dêi Đảng, hiâm mơno kuăn pơlê, “Đảng pơkâ, kuăn pơlê pôk” châ tơdroăng ki môi tuăn, hâk vâ hên dêi mâu kăn Kuô̆k hô̆i cho teăng mâ ăm kuăn pơlê”.