Kơnôm ai Tơdroăng tơkêa bro 8 mê nâ Châu Thị Ngọc Điệp ối a kơtâu Đại Nghiã Thắng, cheăm Đại Tâm châ veăng pêi hên tơdroăng hnê tối a cheăm pơlê. Ing mê, nâ hnê ăm mâu rơpŏng kuăn pơlê ki rêh ối rơtâ tá hlê plĕng tơdroăng kring vế, rak ngăn vâi kơdrâi ƀă vâi hdrêng.

“Pin veăng pêi Tơdroăng tơkêa bro 8 mê xuân hnê tối kuăn pơlê vâi nâ o pin ƀă ôh tá chiâng tôu pâm kuăn ‘nĕng môi tiah hdrối nah, kring vế vâi kơdrâi ƀă vâi hdrêng a pơchê cheăm tơná’’.

Tơdroăng tơkêa bro 8 châ tơbleăng pêi a 3 kơtâu ki kơtiê xơpá má môi dêi tơring Mỹ Xuyên. Mê cho kơtâu Đại Nghiã Thắng, cheăm Đại Tâm, kơtâu Sóc Bưng, cheăm Thạnh Phú ƀă kơtâu Phú Giao, cheăm Thạnh Qưới ƀă hên tơdroăng pêi pro ki ê hiăng ƀă dế pêi. Nâ Dương Thị Mỹ Nhiên, Chi hô̆i  trương ngăn Vâi kơdrâi a kơtâu Phú Giao, cheăm Thạnh Qưới, tơring Mỹ Xuyên, kong pơlê Sóc Trăng tối:

“Tung la ngiâ, Chi hô̆i ngăn vâi kơdrâi kơtâo Phú Giao, cheăm Thạnh Qưới kô tơrŭm ƀă mâu khu ngăn vâi kơdrâi rêm râ ƀă mâu râ kơvâ cheăng, pêi tro hnoăng cheăng  dêi Tơdroăng tơkêa bro 8. Kố cho môi tung mâu tơdroăng cheăng pêi tro tiô troăng pơkâ ki kân, kal khât tơdjâk troh vâi kơdrâi ƀă vâi hdrêng, troh mâu pơkâ ôh tá pơrah pơla kơdrâi ƀă kơnốu hlối tơkŭm tơleăng mơnhên châ tơƀrê mâu tơdroăng ki kal dêi vâi kơdrâi ƀă vâi hdrêng tung kơpong kuăn ngo’’.

Tung pơla hdrối kố nah, Khu ngăn vâi kơdrâi tơring Mỹ Xuyên tơkŭm a 3 tơdroăng ki kal. Mê cho tơdroăng hnê mơhno mơhnhôk pơhlêh tuăn tơmiât túa pêi cheăng, veăng xut tah ki tăm nâ, hêng hôu dêi rơpó ƀă tơdroăng tung rơpŏng hngêi ƀă kuăn pơlê, mâu túa tơlá ton nah ki ôh pá tro tah lôi ƀă mâu tơdroăng ki kal ăm vâi kơdrâi ƀă vâi hdrêng; Mơjiâng ƀă po rơdâ mâu túa pơhlêh tơmiât túa pêi pro, mơdêk hnoăng cheăng kâ ăm vâi kơdrâi; mơdêk ôh tá pơrah pơla kơdrâi ƀă kơnốu ƀă tơleăng mơnhên mâu tơdroăng ki kal dêi vâi kơdrâi ƀă vâi hdrêng; rak tơniăn rơkong tơpui ƀă tơdroăng veăng pêi dêi vâi kơdrâi ƀă vâi hdrêng tung mâu tơdroăng mơnhông cheăng kâ rêh ối dêi kuăn pơlê, séa ngăn ƀă  tơpui leăng, kơjo kum vâi kơdrâi veăng pêi tơdrăng cheăng kal kí. Jâ Trần Hồng Ni, Kăn hnê ngăn khu vâi kơdrâi tơring Mỹ Xuyên, kong pơlê Sóc Trăng ăm ‘nâi:

“Vâ pêi tro tơdroăng tơkêa bro 8, Khu ngăn vâi kơdrâi tơring Mỹ Xuyên mơdêk hnoăng cheăng hnê tối, mơjiâng mâu túa ki tơtro ƀă tơdroăng ki a khât a kong pơlê ƀă tơbeăng mơnhên mâu tơdroăng ki kal ôh tá pơrah pơla kơdrâi ƀă kơnốu tung hên tơdroăng cheăng ƀă vâi kơdrâi ƀă vâi hdrêng kơdrâi a kơpong kuăn ngo kong ngo, tah tơdroăng tăm nâ hêng hôu, túa tơla ôh tá tro, veăng mơnhông tơdjuôm dêi kong pơlê”.

Klêi tơdroăng Tơdroăng tơkêa bro 8, ki ôh tá pơrah pơla kơdrâi ƀă  kơnốu ai pơxúa ăm pú hên, pêi cheăng, rak ngăn ivá vâi kơdrâi a Sóc Trăng hiăng châ ‘mâi hơ’lêh; malối cho vâi kơdrâi a kơpong hngế hơngo, kơpong hdroâng kuăn ngo. Hnoăng cheăng mê dêi vâi kơdrâi rế ton rế châ mơhno tung mâu kơvâ cheăng tung rêh ối pơlê pơla ƀă tung rơpŏng hngêi. Ki kơtăn hơngế kô pơhlêh, kơdrâi ƀă kơnốu châ pêi pro tơ’lêi hlâu  rế ton rế tro tâ.

Tiô kơxô̆ chêh ‘măn riân troh mơ’nui hơnăm nah, lâp tung kong pơlê  ai 109 to cheăm, bêng, pơlê kân ai túa cheăng hbrâ, mơdât tơhôu tơhêng tôu pâm dêi on veăng tung rơpŏng hngêi ƀă vâ chê 189 Kâu lak ƀô̆, vâ chê 650 khu cheăng hbrâ, mơdât tơhôu tôu pâm dêi rơpó tung on veăng rơpŏng hngêi, lối 800 inâi chêh ki loi khât a tung kuăn pơlê, vâ chê 850 phôn krếo drêng ai tơdroăng kal.