Pôa Nguyễn Phú Trọng, Kăn xiâm pơkuâ hnê ngăn cheăng Đảng tơnêi têa cho môi ngế Kŏng san tơdrăng lĕm, môi ngế kăn pơkuâ ki rơkê, ngế ki đi đo môi hiâm mơno pơla tơpui ƀă pêi, xo kuăn pơlê ki kơxái ki vê, xo kuăn pơlê bro tơdroăng ki tro ‘ló, xo ki pơxúa cho tơdroăng mơ-eăm vâ pêi; đi đo a chê ƀă kuăn pơlê, hmâ ƀă kuăn pơlê ƀă ai môi plâi nuih ki têm rơpiât ó khât.

“Tơnêi têa pin tá hâi la lâi ai mâu ngế ki rơkê plĕng ƀă châ kuăn pơlê tung lâp plâi tơnêi loi nhuô̆m môi tiah hâi kố ai tơ’nôm rôh ki tơ’lêi hlâu vâ prôk tung troăng prôk ki Đảng pin, kuăn pơlê pin ƀă Pôa Hồ pâ nhuô̆m hiăng rah xo’’.

Kố cho rơkong tối rơdêi dêi pôa Nguyễn Phú Trọng, Kăn xiâm pơkuâ hnê ngăn cheăng Đảng a Rôh hôp má môi Khu pơkuâ ngăn Tíu xiâm Đảng hneăng 13 ƀă a hên rôh hôp ki kal drêng Kăn xiâm pơkuâ hnê ngăn cheăng Đảng hiăng tối nhên troh tơdroăng kố drêng ki khât ăm hlo, klêi kơ’nâi vâ chê 40 hơnăm po mâu tơdroăng cheăng pơhlêh nếo, ing môi tơnêi têa kơtiê, ai mâu hngêi trăng troăng - kih thuât, hngêi trăng cheăng kâ rêh ối pơlê pơla ki ton nah, tuăn ngoâ tá hâi hlê plĕng, pêi lo liăn châ tơtêk; tơdroăng mơhno túa lĕm tro pơlê pơla pơtối châ mơnhông, tơdroăng rêh ối liăn ngân ƀă hiâm mơno dêi kuăn pơlê châ pơhlêh; hnoăng cheăng mơjiâng Đảng ƀă khu pơkuâ tơdroăng kal kí hôm mơnhông tơƀrê; khu tơrŭm tâi tâng mâu hdroâng kuăn ngo pơtối châ mơnhông; tơdroăng kal kí, rêh ối pơlê pơla tơniăn, tơdroăng cheăng lêng, gâk kring, tơniăn krê, hnoăng pơkuâ châ rak vế; tíu ối ƀă tơdroăng ki châ vâi lo tơngah dêi tơnêi têa rế hía rế châ mơdêk a mâu kong têa ê.

“Pin cho kuăn cháu pôa Hồ, Đảng cho Đảng Kŏng san Việt Nam hdroâng kuăn ngo cho hdroâng mơngế Việt Nam, tơnêi têa kố athế mơnhông tơtêk pôi tá chiâng ton tơrŏng tâng vâ pơchông ƀă mâu kong têa ê ôh tá vâ ngế ki ê pin athế mơnhên khŏm mơ-eăm hiâm mơno môi tiah mê’’.

Vâ ăm tơnêi têa pơtối mơnhông tơxâng ƀă mâu kong têa 5 kơpong tung plâi tơnêi môi tiah tơdroăng ki Pôa Hồ rơhêng vâ, tiô Kăn xiâm hnê ngăn Đảng pakĭng tơdroăng ki môi hiâm mơno dêi khu pơkuâ ngăn tơdroăng kal kí ƀă mâu rơxông kuăn pơlê tung lâp tơnêi têa mê xuân kal ngăn nhuô̆m hnoăng cheăng kăn ƀô̆. Troh veăng hôp ƀă tơpui hnê mơhno a rôh hôp apoăng dêi Chin phuh pơla hơnăm 2021 -2026, pôa Nguyễn Phú Trọng, Kăn xiâm pơkuâ hnê ngăn cheăng Đảng pơkâ thế, pêi pro tro tâ nếo hnoăng cheăng kăn ƀô̆, malối cho tơdroăng ki pơkuâ ngăn, séa  ngăn, mơnhên tối kăn ƀô̆ vâ rah xo, ‘mot tơ’nôm tro mâu ngế ki ai hiâm mơno lĕm khât; kal khât tơdroăng ‘’kơhnâ, kơdĭng, tơdrăng’’, “hiâm mơno ôh tá hriăn vâ pro pơxúa krê’’; cho ivá khŏm mơ-eăm xua tơnêi têa, xua kuăn pơlê tung mâu kăn pơkuâ dêi kơ koan Chin phuh ƀă khu kăn pơkuâ rêm râ. Kăn xiâm pơkuâ hnê ngăn cheăng Đảng hnê pơchân:

“Pôi ‘’ngăn í chiâng chêm têa’’, ‘’pôi hlo khêi tơmiât gá hiăng tum’’, pôi tro pơhlut xua mâu ing mâu ngế ki oh tá lĕm tro, chiâng tơdjâk troh ki lĕm tro kal kí, hiâm mơno, túa rêh ối; tơtrâ mâu tơdroăng ki mơhno ăm hlo ăm liăn pâ tơdroăng cheăng, ăm liăn vâ pro kăn, kơjo kum rah xo dêi mâu nhŏng o hdroâng hdrê ôh tá ai tŭm mâu tơdroăng ki rơkê plĕng mot pêi cheăng’’.

Ƀă a rôh hôp pơxiâm po Hneăng hôp má môi, Kuô̆k hô̆i hneăng XV a hâi lơ 20/7/2021, tối nhên cho kơ koan khu kăn xiâm má môi dêi kuăn pơlê, kơ koan ai hnoăng pơkuâ kân má môi dêi tơnêi têa Kŏng hoa xah hô̆i chuh ngiah Việt Nam, pôa Nguyễn Phú Trọng, Kăn xiâm pơkuâ hnê ngăn cheăng Đảng pơkâ thế, Kuô̆k hô̆i kal mơdêk mâu tơdroăng ki pêi pro tơƀrê ƀă ki rơkê plĕng dêi 75 hdrối nah, pơtối hơ’lêh nếo, mơdêk tâ  nếo ki rơkê ƀă ki tơƀrê tung pêi cheăng vâ pêi pro châ tơdroăng púi vâ tro má môi tơdroăng pơkâ thế, hnoăng cheăng kal kí dêi tơnêi têa tung hneăng nếo. Rơhêng vâ tiah mê pôa Nguyễn Phú Trọng, Kăn xiâm pơkuâ hnê ngăn cheăng Đảng hnê pơchân:

“Tâi tâng mâu kăn Kuô̆k hô̆i pin hneăng ki kố kal pơtối mơdêk hiâm mơno pôu râng dêi hnoăng cheăng, tâi hiâm mơno xua tơnêi têa, xua kuăn pơlê, tŏng kum Tơnêi têa, kum kuăn pơlê, đi đo hriâm pât dêi hiâm mơno, rak vế túa ki lĕm, hiâm mơno, mơdêk tơdroăng ki rơkê ‘na mâu kơvâ cheăng, hmâ a chê ƀă tơmâng mâu rơkong tơpui tối dêi kuăn pơlê, pêi pro ƀă pêi klêi hnoăng cheăng ki kuăn pơlê pơcháu”.

Mâu rơkong tối, mâu rơkong tơpui ki ôh tá kâi piu dêi pôa Nguyễn Phú Trọng, Kăn xiâm pơkuâ hnê ngăn cheăng Đảng – Ngế Kŏng san ki tơdrăng lĕm, môi ngế kăn pơkuâ ki rơkê, ngế ki đi đo môi hiâm mơno pơla tối ƀă pêi, xo kuăn pơlê pro kơxái ki vê, xo kuăn pơlê bro tơdroăng ki lĕm  tro, xo ki pơxúa dêi kuăn pơlê bro tơdroăng ki vâ pêi mơ-eăm; đi đo a chê ƀă kuăn pơlê, tĕn ƀă kuăn pơlê ƀă ai môi plâi nuih têm rơpiât.