Khu kố hiăng diâp reăng ƀă tơmeăm, hlối tơpui tơno ƀă hmâng Nôu tối mâu khế hơnăm tơplâ dêi rơpŏng. Khu kố pơtroh rơkong rơkâu drêng hâi leh lơ 20/10 ƀă mơhnhôk Nôu pơtối rêh hơniâp, rêh mo sêi, cho ngế ki bâ eăng ăm mâu rơxông kuăn cháu tiô ƀối. Hmâ pôu kơ-êng Nôu Việt Nam khên tơnôu cho môi tung mâu tơdroăng cheăng tŏng gum rêh ối pơlê pơla dêi on tơhrik Dak Lak vâ mơnê mâu rơpŏng ki ai hnoăng ƀă kăch măng, veăng gum hnê hriâm khôi hmâ “pâ troh mâu ngế ai hnoăng” dêi hdroâng mơngế.

Tiô châ ‘nâi, tung 9 khế hdrối, Kong đoân on tơhrik Dak Lak hiăng ‘măn vâ chê 1 rơtal liăn vâ pêi hnoăng cheăng tŏng gum rêh ối pơlê pơla a kong pơlê ƀă tŏng gum rơpŏng kuăn pơlê mâu hdroâng kuăn ngo ki trâm khía mơhot têa kân lân lu pro vâ tơkâ luâ pá puât.