Ing rôh ki châ mơjiâng a hơnăm 1977 troh nôkố, châ tơdroăng ki tơmâng ngăn, tŏng gum dêi khu râ Đảng, khu kăn pơkuâ ƀă kuăn pơlê tung kơpong, Hngêi trung râ má pái Phạm Hùng hiăng tơkâ luâ hên tơdroăng pá puât, tơrŭm, mơ-eăm, tơ’noăng hnê rơkê, hriâm rơkê, châ hên tơdroăng ki ƀlêi chiâng. Nôkố ƀă 40 lâm hriâm, tâi tâng kơxô̆ ngế hok tro cho 1.571 ngế o.

Teăng mâ kăn pơkuâ hnê ngăn Đảng, Tơnêi têa, pôa Trần Thanh Mẫn, Kăn xiâm hnê ngăn Kuô̆k hô̆i phiu ro hlo mâu tơdroăng ki xiâm mơnhông dêi hngêi trung hiăng pêi châ tơƀrê tung pơla hdrối nah kơnôm ing mâu ivá mơ-eăm dêi mâu thái cô ƀă hok tro dêi hngêi trung; tơdrêng amê hlối phiu ro kơvâ hnê hriâm kong pơlê Vĩnh Long cho tíu ki bâ eăng dêi kơpong tơbăng Kroăng Cửu Long tối krê, dêi kơpong Nam Bộ ƀă lâp tơnêi têa tối tơdjuôm.

Pôa Trần Thanh Mẫn, Kăn xiâm hnê ngăn Kuô̆k hô̆i tối nhên, Đảng ƀă Tơnêi têa pin đi đo mơnhên hnê hriâm cho tơnêi têa ki kal xiâm, ‘no liăn ăm hnê hriâm cho ‘no liăn ăm mơnhông rak vế tơniăn ăm vâi hdrêng tung hơnăm pơrá châ troh hngêi trung, mâu vâi o hok tro châ hriâm tâp tung tơdroăng ki tơniăn lĕm má môi; tơkŭm hnê ăm mâu ngế cheăng, malối cho mâu ngế cheăng rơkê plĕng, môi tung mâu ngế ki kal má môi pơkâ ki rơkê plĕng dêi tơdroăng rêh ối kuăn mơngế ƀă tơdroăng ki mơnhông rĕng, krá ton dêi tơnêi têa, tối rơdêi ivá tơxup ƀă tíu ối dêi tơnêi têa a kơpong ƀă a lâp plâi tơnêi.

Pôa Trần Thanh Mẫn, Kăn xiâm hnê ngăn Kuô̆k hô̆i tiah kố, môi hơnăm hriâm nếo hiăng pơxiâm ƀă hên tơdroăng ki hơniâp ro ƀă pơloăng mơnúa nếo; rôh hriâm 3 hơnăm trung hok phôh thong ai pơxúa kal khât, hdró tơdroăng ki mơnhông ‘na mâu tơdroăng dêi hok tro. Xua mê, Kăn xiâm hnê ngăn Kuô̆k hô̆i púi vâ mâu vâi o hok tro kô ai hên tơdroăng ki ro, ivá tung hriâm tâp; pôi tá la lâi pơtê mơ-eăm, hriâm pât tiô troăng tơdjâ Pôa Hồ khên tơnôu, troăng tơdjâ meh Hai Phạm Hùng dêi pơlê xiâm Vĩnh Long; tơrŭm, pâ nhuô̆m, tŏng gum dêi rơpó rơtế mơnhông rơkê; hbrâ rơnáu tŭm tơdroăng ki rơkê plĕng, troăng tơmiât ‘na tơdroăng cheăng pêi, ƀă mâu tơdroăng tơchĕng tơmiât ki kân vâ troăng pêi cheăng tung la ngiâ; pâ mơnê hnoăng rơnêh mâ păn roăng dêi nôu pâ, hnoăng cheăng hnê khĕn dêi mâu thái cô yăo.

Pôa Trần Thanh Mẫn, Kăn xiâm hnê ngăn Kuô̆k hô̆i pơkâ thế rêm ngế mâu thái cô yăo, kô cho “môi ngế ki djâ troăng ahdrối lĕm ‘na hiâm mơno, mơ-eăm hriâm xêh ƀă tơmiât rơkê”; đi đo mơ-eăm, pôu râng dêi hnoăng ƀă tơdroăng cheăng, tâi ivá pâ nhuô̆m, hnê khĕn kơhnâ rơkê ƀă hok tro; “Cô thái môi tiah nôu pâ”, cho ngế ki hnê ăm tơdroăng ki rơkê plĕng, mơnhông tơdroăng hâk vâ, ivá vâ mâu vâi o hâk vâ hriâm tâp, hriâm pât túa ki lĕm, tí tăng ‘nâi mâu tơdroăng ki nếo dêi tuăn ngoâ rơkê.

“Á loi tâi tâng mâu kăn ƀô̆, thái cô, mâu vâi o hok tro dêi hngêi trung pêi pro tro khât tơdroăng ki hnê pơchân dêi pôa Tô Lâm, Kăn xiâm pơkuâ ngăn Đảng, Kăn xiâm hnê ngăn tơnêi têa tung kơthô pơtroh ăm kơvâ ngăn hnê hriâm drêng rôh leh pơxiâm mot tung hơnăm hriâm nếo; pôi tá pơtê hơ’lêh nếo, mơdêk ki rơkê tung hnê ƀă hriâm, mơjiâng túa lĕm tro a hngêi trung hriâm túa lĕm tro krê dêi kơpong tơnêi tơníu tĭng, tuăn mơno lĕm Long Hồ, Vĩnh Long; veăng gum tơƀrê tung “mơdêk ki rơkê plĕng ăm kuăn pơlê, hnê mâu ngế pêi cheăng, hnê tơ’nôm mâu ngế ki rơkê plĕng”, tơxâng ƀă hngêi trung krâ inâi Kăn xiâm hnê ngăn Hô̆i đong Ngế xiâm pơkuâ Phạm Hùng. Hơnăm hriâm 2024-2025, Tơdroăng hriâm phôh thong 2018 kô pơtối châ tơbleăng, cho hơnăm ki apoăng pêi pro Hneăng tơ’noăng râ má pái trung hok phoh thong tiô tơdroăng hnê hriâm nếo. Á pơkâ thế Khu xiâm ngăn hnê hriâm ƀă hnê mơjiâng tuăn ngoâ rơkê pơtối hnê mơhno, tơkŭm pêi pro tro tơdroăng hnê hriâm phôh thong ki nếo, rĕng pơkâ hnê mơhno, tơkŭm nê hriâm ‘na hneăng tơ’noăng, pro tơ’lêi hlâu má môi ăm mâu vâi o hok tro ƀă rơpŏng hngêi vâi”.

Pôa Trần Thanh Mẫn, Kăn xiâm hnê ngăn Kuô̆k hô̆i pơkâ thế mâu khu râ Đảng, khu kăn pơkuâ, Măt trâ̆n Tơnêi têa, mâu khu tơrŭm cheăng, rêm râ, mâu kơvâ cheăng kong pơlê Vĩnh Long ƀă tơring Long Hồ pơtối tơmâng ngăn, hnê mơhno rak tơniăn tŭm kơƀăng - tăng ƀă mâu liăn ngân ăm kơvâ hnê hriâm ƀă hnê mơjiâng; tŏng gum mơjiâng khu thái cô ƀă kăn ƀô̆ pơkuâ ngăn hnê hriâm ai tŭm thái cô hnê tiô kơlo pơkâ; hơ’lêh nếo rơdêi túa hnê ƀă hriâm, mơdêk ki rơkê plĕng tung hnê tŭm têk a rêm râ hriâm; mơdêk rơdêi tơbleăng mơjiâng túa lĕm tro a hngêi trung hriâm; thăm mơdêk tơrŭm pơla rơpŏng hngêi, hngêi trung ƀă pơlê pơla tung hnê hriâm hok tro.