Tơpui a rôh pêi cheăng, pôa Trần Thanh Mẫn - Kăn xiâm hnê ngăn Kuô̆k hô̆i ăm ‘nâi, troh nôkố, Kuô̆k hô̆i hiăng pêi klêi hên hĭn mâu tơdroăng cheăng ki kân, mê cho po 14 hneăng hôp, tung mê, ai tá hneăng hôp tiah hmâ ƀă hneăng hôp ki ôh tá tối hdrối. Tơdroăng ki pêi pro túa pơkâ dêi Đảng Đoân dêi Kuô̆k hô̆i, Tơdroăng pơkâ Hneăng hôp Đảng lâp tơnêi têa rôh má 13, mơgêi kơxô̆ 19 dêi Kuô̆k hô̆i hneăng 15 pêi châ tơƀrê hên tơdroăng cheăng.

Ki nhên tung 156 hnoăng cheăng mơjiâng luât hiăng klêi 131 hnoăng cheăng. Mâu tơdroăng pơkâ, túa pơkâ dêi Đảng Đoân Kuô̆k hô̆i hiăng pêi pro lối 81%. Klêi kơ’nâi mâu hneăng hôp kơ’nâi, hên tâ mâu hneăng hôp hdrối, châ kuăn pơlê mơnhên tối.

Tiô pôa Trần Thanh Mẫn - Kăn xiâm hnê ngăn Kuô̆k hô̆i, rôh hôp kố cho vâ mơnhên tối mâu tơdroăng cheăng ki hiăng pêi; tơdrêng amê hlối vêh ngăn mâu tơdroăng cheăng tơná pêi tá hâi klêi, ối ‘ro hên mâu tơdroăng, kal rơkê plĕng vâ pêi pro tro tâ.

Ăm ‘nâi, tung hâi khế ki u ối, Kuô̆k hô̆i kô po 3 hneăng hôp tiah hmâ bă 1 roh hôp mơgêi hneăng cheăng Kuô̆k hô̆i hneăng 15, pôa Trần Thanh Mẫn - Kăn xiâm hnê ngăn Kuô̆k hô̆i tối tiah kố, kố cho tơdroăng cheăng ki kân. Xua mê, Kăn xiâm hnê ngăn Kuô̆k hô̆i pơkâ thế, Hô̆i đong Hdroâng kuăn ngo, mâu Vi ƀan dêi Kuô̆k hô̆i athế pêi pro kơtăng vâ ai mâu tơdroăng cheăng pê ki rơkê. Malối, cho a hơnăm 2025, tơnêi têa pin ai hên tơdroăng cheăng tơkŭm po ki kân môi tiah: Tơbâ 80 hơnăm Kăch măng Khế 8 ƀă hâi Mơjiâng Tơnêi têa lơ 2/9; 50 hơnăm Tơleăng lĕm peăng Hdroh tơnêi têa tơrŭm môi; hnoăng cheăng hbrâ rơnáu tâ phĭu pôk kăn Kuô̆k hô̆i hneăng 16 ƀă Hô̆i đong hnê ngăn rêm râ pơla hơnăm 2026 – 2031. Hơnăm 2026, Kuô̆k hô̆i Tơbâ 80 hơnăm hâi tâ phĭu pôk Kăn xiâm hnê ngăn Kuô̆k hô̆i Việt Nam.

A rôh pêi cheăng, Kăn pơkuâ mâu Vi ƀan Túa lĕm tro Hnê hriâm; Vi ƀan Pơlê pơla; Khu Pêi hnoăng cheăng khu kăn hiăng pơchuât hlá mơ-éa klêi kơ’nâi pêi pro mâu tơdroăng cheăng, hnoăng cheăng ki kal troh mơ’nui hneăng.

Klêi kơ’nâi tơmâng mâu rơkong tơpui tối, mơgêi a rôh pêi cheăng, pôa Trần Thanh Mẫn - Kăn xiâm hnê ngăn Kuô̆k hô̆i mơnhên tối klêi kơ’nâi hiăng pêi châ rơhéa dêi mâu Vi ƀan. Tung mê, Vi ƀan pơlê pơla hiăng pêi klêi 10 hnoăng cheăng; Vi ƀan Túa lĕm tro, Hnê hriâm pêi klêi 6 hnoăng cheăng; Khu pêi dêi hnoăng cheăng khu kăn pêi klêi 10 hnoăng cheăng. ‘Na hnoăng cheăng mơjiâng luât, Vi ƀan Pơlê pơla hiăng pêi klêi 25 hnoăng cheăng; Vi ƀan Túa lĕm tro, Hnê hriâm hiăng pêi klêi 14 hnoăng cheăng; Khu pêi dêi hnoăng cheăng khu kăn hiăng pêi klêi 4 hnoăng cheăng.

Kăn xiâm hnê ngăn Kuô̆k hô̆i xuân tối tiah kố, maluâ châ pêi tơƀrê hên mâu tơdroăng cheăng, laga xuân ối ai mâu tơdroăng ki tá hâi pêi klêi tung tơdroăng tơrŭm, mơjiâng túa pơkâ tá hâi tro ƀă ki ai khât, tơbleăng tá hai teăm tơdrêng, tá hâi hlê plĕng.

Pôa Trần Thanh Mẫn - Kăn xiâm hnê ngăn Kuô̆k hô̆i pơkâ thế, mâu Vi ƀan, Khu pêi dêi hnoăng cheăng khu kăn têk kŏng hên, khŏm mơ-eăm ‘mâi mơnhông ki tá hâi kâi chiâng pêi pro klêi; rak vế tơdroăng tơrŭm môi tuăn tung tíu pêi cheăng; thăm mơdêk rak vế pơkí tơdroăng kal; pôu râng dêi tơdroăng tơpui.

“Á pơkâ thế tơkŭm ‘mâi rơnêu troăng pêi cheăng dêi Hô̆i đong Hdroâng kuăn ngo, mâu Vi ƀan dêi Kuô̆k hô̆i; xing xoăng hnoăng cheăng pêi ăm tơtro, mâu tơdroăng klâi ki kal, ki xiâm vâ tơkŭm ivá pêi; hbrâ rơnáu tơdroăng kal veăng tơpui a hneăng hôp má 8, tơrŭm tơkŭm po Rôh hôp Khu kăn Kuô̆k hô̆i ki rơkê rôh má 6; pơtối hriăn ngăn, tơpui tối leăng, tơmâng xo, ‘mâi rơnêu mâu tơdroăng tơkêa luât, kơxop hlá mơéa Pơkâ hiăng châ Kuô̆k hô̆i ăm rơkong veăng tơpui tối pâ thế a Hneăng hôp má 7 vâ pơtroh tơbleăng a Hneăng hôp má 8.

Pakĭng mê, Kăn xiâm hnê ngăn Kuô̆k hô̆i xuân pơkâ thế mâu Vi ƀan dêi Kuô̆k hô̆i tơrŭm séa ngăn Chin phuh tung tơdroăng tơbleăng mâu tơdroăng tơkêa luât, Tơdroăng pơkâ hiăng châ Kuô̆k hô̆i tơbleăng a mâu hneăng hôp; hnoăng cheăng séa ngăn kal ai túa pơkâ ing hdrối vâ ví bô bối a mâu túa pơkâ; pơtối pêi pro mâu hnoăng cheăng tô tơdroăng pơkâ tơkŭm po Tơbâ 80 hơnăm Hâi Pôk Kăn xiâm Kuô̆k hô̆i Việt Nam ki apoăng, Pri hlá tơbeăng Diên Hồng rôh má 3; séa ngăn pơhlêh nếo mâu túa pơkâ, hlá mơ-éa tiô troăng rế hía rế rơkê, khât, rơkê, tơƀrê; malối tơbleăng tro troăng liăn khế nếo ing khế 7/2024; thăm mơdêk hnoăng cheăng rak vế kal kí tung tíu pêi cheăng.