A kơpong hngêi kơmăi kơmok Tân An, pơlê kong kơdrâm Ƀuôn Ma Thuột, hên kŏng ti tơbleăng rah xo mơngế pêi cheăng pơchoh chêp hmân ếo, điê̆n tưh, mơjiâng pro xâk mâ ƀă tơdroăng mơjiâng pro hên. Mơhé tối ai kơjo mơhá hên ƀă kơlo liăn khế, liăn mơhá, ăm châ ai hâi pơtê tung rơnó pôe xo tơmeăm laga hên kŏng ti xuân ôh tá tăng tŭm kŏng nhân. Pôa Trần Chí Vĩ, Kăn pơkuâ khu mơdró pơchoh chêp hmân ếo Lực Thiêm tối ăm ‘nâi, kŏng ti ai tơdroăng kal vâ rah xo tơ’nôm 300 ngế pêi cheăng, laga bu nếo châ rah xo dâng 50 ngế:

“Drêng roh rơnó kơphế, rơnó tiu tâng kŏng nhân ai tơnêi pêt loăng plâi, vâi kô châ kĭ vâ pơtê tung pơla mê vâ vêh a hngêi gum tơdroăng cheăng a hngêi. Xuân pói tơngah klêi rơnó kơphế khế 6 kố mê rah xo mơngế pêi cheăng kô tơ’lêi hlâu tâ’’.

Ƀă a kơpong hngêi kơmăi kơmok Čư̆ Kuiñ, tơdroăng ôh tá bê mơngế pêi cheăng, ki má lối cho mơngế pêi cheăng ki hiăng chiâng pêi, pro hên kŏng ti thế vêh pơhlêh pơkâ pêt mơjiâng xuân môi tiah tơdah tơmeăm dêi khu tơrŭm. Pôa Vũ Nguyễn Tường Linh, pơkuâ rah xo mơngế dêi kŏng ti kơphế Ngon tối ăm ‘nâi, kŏng ti hiăng tơdjêp tíu vâ rah xo ƀă mâu hngêi trung kao đẳng, đăi hok tung kong pơlê ƀă hbrâ hnê mơjiâng cheăng pêi tê kơtê, laga kơxô̆ đơn pâ mot pêi cheăng xuân tá hâi châ môi tiah tơdroăng pói vâ:

“Kŏng ti ngin kal rah xo dâng 50 ngế pêi cheăng ing pêi cheăng phôh thong troh pêi cheăng môi tơdroăng cheăng. Ki pá dêi ngin cho ôh tá tŭm mơngế pêi cheăng ki môi tơdroăng cheăng, ki rơhêng vâ tối cho mâu kơvâ cheăng kih thuât môi tiah on tơhrik, cơ khĭ. Ƀă ki phá tơ-ê dêi kŏng ti ngin cho môi kŏng ti xua kong têa ê mơ’no liăn cheăng, ngin kal tơ’nôm chiâng tơpui nâl kong têa ê mê cho tơdroăng ki ôh tá chiâng dêi mâu ngế pêi cheăng a Dak Lak’’.

Tơdroăng ki ôh tá bê kŏng nhân dế ai a tung kong pơlê Dak Lak. Jâ Nguyễn Thùy Tâm, ngế pơkuâ mơngế pêi cheăng kŏng ti Trung Nguyên Franchising a Dak Lak tối ăm ‘nâi, kŏng ti hiăng mơdêk tơdroăng kơjo mơhá liăn laga pá vâ rah xo mơngế pêi cheăng:

“Drêng vâi pêi cheăng, mê vâi châ tơ’noăng mơdêk râ, châ kĭ tơkêa pêi cheăng tŭm mâu tơdroăng tŏng kum tiô luât pêi cheăng. Pakĭng mê vâi ối châ mơhá liăn KPI, tơmeăm kot mâ, leh, têt ƀă ki rơhêng vâ tối cho mơhá liăn drêng pêi cheăng hiăng ton hơnăm. Peăng ngin xuân tơbleăng rah xo tung hên trang măng, laga nôkố tơdroăng kal vâ rah xo mơngế pêi cheăng xuân tá hâi tŭm’’.

Tiô tơbleăng dêi Tíu xiâm tơbleăng cheăng pêi kong pơlê Dak Lak, tung 6 khế apoăng hơnăm Tíu xiâm ai lối 50 roh khu tê mơdró veăng ƀă lối 20 roh tơbleăng cheăng pêi ƀă tơdroăng kal vâ chât ngế pêi cheăng. Laga, ki nhên khât kơxô̆ mơngế châ rah pêi cheăng ôh tá châ môi tiah tơdroăng pói vâ. Pôa Nguyễn Hoàng Giang, Kăn pơkuâ Khu pơkuâ cheăng pêi Mô đô̆i rong râ ƀă Rêh ối pơlê pơla kong pơlê Dak Lak tối:

“Rah xo mơngế hriâm cho ki má môi pá puât. Tơdroăng má 2 nếo cho drêng hnê mơjiâng mê khu tê mơdró thế vêh hnê mơjiâng, ôh tá chiâng xúa xua tơmeăm khoăng, kơmăi kơmok hnê hriâm, tơdroăng ki rơkê hriâm dêi hngêi trung, tá hâi tơtro ƀă khu tê mơdró vâi kal ki klâi’’.

Xuân tiô pôa Nguyễn Hoàng Giang, hơnăm 2024, kong pơlê Dak Lak mơ-eăm tăng cheăng pêi ăm lối 30.000 ngế. Vâ châ pơkâ kố, mâu tíu hnê cheăng pêi kal mơdêk tơdroăng hnê mơjiâng, tơxâng pơkâ dêi khu tê mơdró, hnê mơjiâng tiô đơn kok tơmeăm, tơdroăng kal vâ inhên dêi khu tê mơdró. ‘Na peăng mơngế pêi cheăng kal pơtâp, hriâm tơdroăng cheăng kih thuât, tơdroăng cheăng pêi ƀă thăm pêi pro, hbrâ ti tăng cheăng pêi.