Kơxê hâi lơ 10/9, pôa Vũ Hải Quang, Kăn phŏ pơkuâ Rơ’jíu xiâm Việt Nam hiăng troh lăm pôu hơlêm tơdroăng khéa kho ƀă hlối diâp kơxô̆ liăn 10 rơtuh ăm rơpŏng hngêi Thiê̆u tă kŏng an Trần Quốc Hoàng, kăn ƀô̆ ki pêi cheăng gak ngăn Hngêi phak Quảng Ninh hiăng hlâ drêng pêi cheăng hbrâ ví khía kân Yagi plong mot.

Kơmăng hâi lơ 7/9, thiê̆u tă Trần Quốc Hoàng hiăng tơnôu tơmu  pơla kong mêi khía, lôu po cheăng pá rŏng vâ ăm têa tung kơpong  hngêi kroăng phâk châ lo vâ tơniăn ăm vâi pú ƀă mâu ki kroăng phâk châ hluăn xía vâ, la xua têa lối hên, hlối kơtê meăm klêi lôu bo cheăng, thiê̆u tă Hoàng hiăng tro têa lu mơhiu, hlâ tung pơla dế pêi cheăng. 

Tung kơmăng, veăng hbrâ ví xía vâ ƀă vâi pú, Thươ̆ng ŭy Nguyễn Đình Khiêm xuân hiăng hlâ. Rơtế lăm pôu hơlêm rơpŏng hngêi 2 ngế kŏng an, pôa Vũ Hải Quang, Kăn phŏ pơkuâ Rơ’jiu Việt Nam diâp kơxô̆ liăn 10 rơtuh ăm on veăng 2 rơpŏng hngêi.