Hlo mâu tơdroăng ki hlâ hía ‘na kuăn mơngế, tơ’nhiê hngêi trăng tơmeăm khoăng, châi heăng klêi kơ’nâi khía mơhot kân rôh má 3 plong mot xuân môi tiah kong mêi têa kân lân lu a mâu kuăn pơlê mâu kong pơlê peăng Kơnhŏng, Khu pơkuâ ngăn Đoân Droh rơtăm Kon Tum krếo thế rêm râ khu pơkuâ Đoân rơtế ƀă lối 33 rơpâu ngế đoân viên, droh rơtăm tung kong pơlê veăng tơlo liăn kum kuăn pơlê ‘mâi mơnhông dêi kế tơmeăm klêi kơ’nâi kong mê khía mơhot kân têa lân lu.

Ƀă hiâm mơno hơ-ui dêi rơpó, rôh veăng tơlo kum kuăn pơlê châ Khu pơkuâ ngăn Đoân Droh rơtăm Kon Tum pêi ing hâi nôkố troh tâi hâi lơ 15/9. Klêi leh tơbleăng ƀă hiâm mơno hơ-ui tâi tâng kăn ƀô̆, kong chưk, viên chưk kơ koan khu pơkuâ ngăn Đoân Droh rơtăm Kon Tum hiăng pêi pro tơdroăng ki tơlo liăn tŏng gum kuăn pơlê kơpong kong mêi têa kân lân lu mâu kong pơlê peăng Kơnhŏng.