Kal khât pêi pro mâu tơdroăng tơmiât troh koh phiu ro leh tơbâ 120 hơnăm mơjiâng kong pơlê Dak Lak, sap ing khế 3 hơnăm kố, Khu xiâm Kŏng an hiăng tơkŭm po Leh pơxiâm pro, diâp hngêi tiô túa nếo ƀă kơxô̆ liăn tŏng kum mơjiâng 1.200 toăng hngêi ăm mơngế kơtiê, mơngế hdroâng kuăn ngo, rơpŏng ai hnoăng tơnêi têa, rơpŏng kơtiê pá puât hngêi ối tung kong pơlê Dak Lak.

Jâ Nông Thị Thu, Kăn phŏ Hnê ngăn Vi ƀan Măt trâ̆n Tơnêi têa Việt Nam kong pơlê Dak Lak tối ăm ‘nâi, troh nôkố, Khu mơhnhôk Kơxô̆ liăn kơdĭng “Kum mơngế kơtiê’’ kong pơlê hiăng mơhnhôk mơjiâng châ 352 toăng hngêi, tâi tâng kơnâ lối 23 rơtal liăn, tơkâ hluâ pơkâ pêi. Mâu tơring hiăng kêi đeăng ƀă pơcháu ăm 225 toăng hngêi vâ kuăn pơlê rĕng châ ối tung mâu toăng hngêi nếo.