Pêi pro tiô rơkong krếo thế dêi pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa ƀă Vi ƀan Tíu xiâm Măt trâ̆n tơnêi têa Việt Nam, pơtối rak vế pêi pro tơdroăng tơrŭm môi tuăn “Hơ ui gum dêi rơpó” , “Hlá lĕm gum hlá tơ’chiê” vâ tối mâu ki tơniăn kum mâu ki pá dêi kuăn pơlê, kơxo hâi lơ 12/9, a Hngêi Kuô̆k hô̆i, hdrối vâ pơxiâm po Rôh hôp má 37 dêi Vi ƀan Pơkuâ cheăng Kuô̆k hô̆i, Ƀơrô Kuô̆k hô̆i tơkŭm po leh beăng tơlo liăn gum mâu kuăn pơlê ki dế trâm pá xua khía kân rôh má 3 plong mot.

Tơbleăng a rôh leh tơlo, pôa Bùi Văn Cường, Ngế chêh tôm xo rơkong dêi Kuô̆k hô̆i, Ngế pơkuâ Ƀơrô Kuô̆k hô̆i ăm ‘nâi, tung mâu hâi hdrối kố nah, khía kân rôh má 3 plong mot pro kong mêi kân, têa lân lu pro lŭp hên kế tơmeăm ƀă hlâ mơngế a hên kong pơlê, pơlê kong kân kơpong peăng Kơnhŏng tơnêi têa pin.

Tối tơdroăng xơpá, veăng gum kuăn pơlê rĕng kâi tơkâ luâ xơpá xua khía kân pro; pơtối rak vế tơdroăng “Hơ-ui gum dêi rơpó’’ dêi rêm hdroâng mơngế ƀă pêi pro tiô rơkong krếo thế dêi pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa ƀă Vi ƀan xiâm Măt trâ̆n tơnêi têa Việt Nam ‘na pơtối pêi mâu tơdroăng ai pơxúa lĕm mơhno ki lĕm tơdroăng pâ dêi rơpó dêi hdroâng mơngế, mâu kuăn pơlê’’; Ƀơrô Kuô̆k hô̆i tơkŭm mơhnhôk veăng tơlo liăn tơmeăm gum kuăn pơlê  ki tro tơdjâk, tơ’nhiê lŭp tơmeăm, rĕng tơniăn tung rêh ối.