Vi ƀan pơkuâ Kuô̆k hô̆i hiăng ăm rơkong tơpui tối leăng, tơmâng xo, ‘mâi rơnêu kơxop hlá mơéa Luât Hbrâ mơdât on chếo trếo pơtôu ƀă tŏng gum mâu ngế hliăng tiâ. Tâng vâ pơchông ƀă kơxop hlá mơ-éa Luât pơchuât a Hneăng hôp má 7, kơxop hlá mơ-éa Luât rôh kố pơkâ 1 tơdroăng krê ‘na hbrâ mơdât chếo ‘na hngêi ối; 1 tơdroăng krê ‘na hbrâ mơdât ‘na hngêi ối hlối tơkŭm tê mơdró; ‘Mot tơ’nôm pơkâ ki nếo ƀă péa túa hngêi ối ki lâi rak tơniăn pơkâ thế ‘na tơdroăng tơniăn hbrâ mơdât on chếo trếo pơtôu, hliăn ing hliăng tiâ.

Laga, tiô pôa Nguyễn Trường Giang, kăn phŏ pơkuâ Vi ƀan ngăn tơdroăng luât, mâu tơdroăng pơkâ kố ối tối bô bối, pá vâ ‘nâi ƀă mâu kơ koan pêi pro luât ƀă kuăn pơlê:

"Pin pơkâ thế ai kế ki tơbleăng ai on chếo lơ trếo pơtôu, troăng ki ai hyôh, kế tơmeăm ki tro lo hyôh chếo, hyôh ‘mêi tiô pơkâ. Tơdroăng akố cho kơbố pơkâ tiah mê mê ôh ‘nâi nhên. Má péa, kố cho túa ki nôkố gá hên malối a mâu kơphô̆, mâu hngêi a troăng kơphô̆ pơrá ai tơdroăng tơrŭm ƀă tê mơdró. Tâng ôh tá pơkâ nhên mê athế pơcháu ăm Chin phuh lơ Ngế xiâm ngăn Kŏng an pơkâ”.

Mâu kăn cheăng tung Vi ƀan pơkuâ Kuô̆k hô̆i malối tối nhên tơdroăng ki ôh tá tơniăn tung on chếo, trếo pơtôu ƀă hbrâ mơdât on chếo ƀă mâu hngêi ki râ xŏn. Pôa Nguyễn Đắc Vinh, Kăn pơkuâ Vi ƀan Túa lĕm tro Hnê hriâm pơkâ thế:

“Mâu hngêi râ xŏn gá xŏn khât, tơkŭm ối hên ngế. Tâng pơtih ôh tá mơhúa trâm tơdroăng ki tro chếo gá xơpá khât vâ tơpâ ƀă tŏng xo mâu ngế ki ối tung hngêi. Mê ki tro má môi athế ai troăng hơlâ châ hbrâ mơdât gá tro má môi. La ki má péa cho mâu túa pơkâ ƀă mâu kế tơmeăm ki hbrâ mơdât on chếo ăm hngêi ki râ xŏn gá ôh tá tơniăn tâ, mê athế pơkâ nhên tơdroăng kố”.

Ƀă Pôa Trần Quang Phương, Kăn xiâm phŏ hnê ngăn Kuô̆k hô̆i tói rơdêi.

“Tâi tâng mâu túa hngêi pơrá athế ai tro pơkâ, tro tơdroăng. La nôkố mâu hngêi ối tơdjuôm ki râ xŏn xuân ối cho tơdroăng ki châ hên ngế kal vâ ‘nâi plĕng má môi cho pơkâ ‘na hbrâ mơdât on chếo trếo pơtôu. Pơtih ai hên hngêi ối tơdjuôm pro tung hơlâ troăng ki kŭn, ôh tá ai troăng rơxế ki tơpâ on vâ châ mot. Bu ai mâu hngei ối tơdjuôm ki nếo bro nôkố tro tiô pơkâ mơjiâng bro tung kơphô̆ tê nếo ai troăng rơxế prôk”.

Xuân tung măng tĭng hdrối, drêng ăm rơkong veăng tơpui tối ‘na tơdroăng ki tơpui tối leăng, tơmâng xo ‘mâi rơnêu kơxop hlá mơ-éa Luât Nâp hnoăng liăn mơhá ki kơnâ tâk ‘mâi hơ’lêh, Vi ƀan pơkuâ Kuô̆k hô̆i tối tiah kố, tơdroăng ki pơhlêh nâp hnoăng liăn mơhá mơjiâng bro phon ing 0% ngi chu nâp hnoăng liăn mơhá 5% mê kuăn pơlê kô tro tơdjâk kân xua yă tê phon rơvât kô to kơnâ, chiâng tơdjâk troh mơdêk yă tê kế tơmeăm xúa tung pêi chiâk deăng. Pôa Y Thanh Hà Niê Kdăm, Kăn hnê ngăn Hô̆i đong hdroâng kuăn ngo tối nhên:

“10 hơnăm kố, yă phon rơvât ôh tá chu kơdroh. Tiô tối tơbleăng phon rơvât kố to kơnâ la yă ki khât ôh tá kơdroh ƀă kuăn pơlê pêi chiâk cho ngế ki chiu. Vâi kal vâ ‘nâi plĕng khât ki dâi lĕm dêi phon rơvât mê á tối tiah kố kố bu nếo cho hnoăng cheăng ki Tơnêi têa tung pơkuâ ngăn kal athế tơmâng ngăn khât”.

Laga, ƀă tơdroăng ki ngăn dêi Khu tơrŭm Tê mơdró Kơmăi kơmok Việt Nam, pôa Đậu Anh Tuấn ăm ‘nâi, tơdroăng ki pơhlêh phon chiâng chiu hnoăng nâp liăn mơhá 5% ôh tá pro kơxô̆ liăn roê phon to kơnâ:

"Ivá mơjiâng pro phon rơvât dêi pin gá kân, mê tâng xúa nâp hnoăng liăn mơhá 5% mê tơkêa vâ tối roê ‘mot xuân vâ 5%, tung tơnêi têa kơxô̆ liăn ki ‘no hrê kơdroh. Tiah mê phon rơvât tê tung tơnêi têa ôh tá ai tíu ki tâk ƀă thăm nếo mơni kô châ tê tung kơchơ tê mơdró. Kố xuân cho môi ƀai toăn ki xiâm riân ngăn mê pro tiah lâi pin rế chiâng mơjiâng bro xêh phon tơvât ƀă rế châ rak vế kơvâ mơjiâng bro phon rơvât tung tơnêi têa”.

Tơpui mơgêi rôh hôp ‘na tơdroăng kal luât khế 8, pôa Trần Thanh Mẫn, Kăn xiâm hnê ngăn Kuô̆k hô̆i pơkâ thế mâu kơ koan tơrŭm cheăng pêi pro klêi 10 kơxop hlá mơ-éa vâ pơtroh hlá mơ-éa mê ăm Rôh hôp Khu kăn Kuô̆k hô̆i ki pơkuâ, tiô tối hdrối kô po ing hâi lơ 28-30/8. Kăn xiâm hnê ngăn Kuô̆k hô̆i xuân ăm ‘nâi, rôh hôp má 36 dêi Vi ƀan pơkuâ Kuô̆k hô̆i kô po ing hâi lơ 19-22/8, ƀă tơdroăng ki kal vâ ‘nâi plĕng a rôh hôp kố cho Vi ƀan pơkuâ Kuô̆k hô̆i kô kơ-êng ƀă 3 ngế xiâm pơkuâ:

"Rôh hôp má 36, kơ-êng ƀă tiâ mâu rơkong kơ-êng dêi ngế xiâm pơkuâ khu râ kơvâ cheăng. Kăn pơkuâ Kuô̆k hô̆i, kăn xiâm hnê ngăn ƀă mâu kăn xiâm phŏ hnê ngăn hiăng pơkuâ po mâu Khu xiâm kơvâ cheăng ƀă Chin phuh vâ hbrâ rơnáu ăm roh hôp kơ-êng ƀă tiâ mơnhên rơkong kơ-êng kố. Tung mê, Ngế xiâm ngăn Chiâk deăng ƀă Mơnhông thôn pơlê, Ngế xiâm ngăn kơmăi kơmok ƀă Tê mơdró, Ngế xiâm ngăn Túa lĕm tro, Tơ’noăng ivá ƀă Ôm hyô” kô tiâ mâu rơkong kơ-êng .