Mơjiâng pro sap hơnăm 2026-2027. Tung tâi tâng kơxô̆ lối 215 rơtal liăn tơ’nôm, ai dâng 184 rơtal liăn dêi Tíu xiâm tơnêi têa, lối 31 rơtal liăn  cho liăn ngân kong pơlê Dak Lak. Vi ƀan hnê ngăn Kuăn pơlê kong pơlê Dak Lak tơ’nôm ăm Hngêi trung hnê ai tíu kâ koi ối pơtê râ má môi ƀă má péa cheăm Ia Lôp 68 rơtal liăn; Hngêi trung hnê ai tíu kâ koi ối pơtê râ má môi ƀă má péa cheăm Ia R’vê châ tơ ‘nôm 59 rơ tal liăn; Hngêi trung hnê ai tíu kâ koi ối pơtê râ má môi ƀă má péa cheăm Buôn Đôn châ tơ ‘nôm 89 rơtal liăn. Kơxô̆ liăn mê xúa vâ mơjiâng pro nếo, pro tơ’nôm hngêi cheăng ăm mâu pơkuâ hngêi trung, hngêi ‘măn rak hlá mơ-éa, hngêi ăm thái cô ối ƀă mâu hngêi ki vâ hnê ƀă hriâm dêi mâu hngêi trung.

Pơla hơnăm 2025-2027, kong pơlê Dak Lak tơbleăng pro 3 toăng Hngêi trung hnê ai tíu kâ koi ối pơtê râ má môi ƀă má péa a kơpong tơkăng kong, mê cho Ia Lốp, Ia R’vê ƀă Buôn Đôn, ƀă tâi tâng kơxô̆ liăn ‘no apoăng pơla pro pơla rôh má 1 lối 390 rơtal liăn. Mâu hngêi trung thế pro kêi ƀă ăm xúa tung hơnăm hriâm 2026-2027. Hơnăm hriâm 2026-2027, mâu hngêi trung phôh thong hnê kuăn ngo ai tíu kâ koi ối pơtê râ má môi ƀă râ má péa a kơpong tơkăng kong dêi kong pơlê Dak Lak kô tơdah xo dâng 3.100 ngế hok tro sap lâm 1 troh lâm 9.