Mâu kăn teăng mâ mơdoh plâ hâi vâ tơpui tơno a tôh ‘na mâu tơdroăng tơkêa bro, tơdroăng xiâm tơbleăng a rôh hôp ki kal ƀă thâ. Peăng kơxo, mâu kăn teăng mâ tơpui tơno a tôh ‘na 3 tơdroăng tơkêa bro Luât cho: Luât hbrâ, mơdât tơbleăng mơhno pháu hnêa ki kơdê hlâ long mơngế; Luât ‘mâi rơnêu, tơ’nôm mâu troăng dêi 9 luât ‘na cheăng lêng, gâk kring tơnêi têa; Luât tơbleăng mơhno, hnê hriâm luât (‘mâi rơnêu).

Peăng kơxê, mâu kăn teăng mâ tơpui tơno a tôh ‘na Tơdroăng tơkêa bro Luât Têa châu (‘mâi rơnêu) ƀă Tơdroăng tơkêa bro Luât ‘mâi rơnêu, tơ’nôm mâu troăng dêi Luât hnoăng cheăng chêl thiê̆n dêi Tơnêi têa. Xuân tung kơxê hnah, mâu kăn teăng mâ tơkŭm tơpui tơno, veăng tơpui ‘na Tơdroăng tơkêa bro Tơdroăng pơkâ dêi Kuô̆k hô̆i ‘na troăng pơkâ pêi, troăng hơlâ ki phá tơ-ê vâ tơpui ƀă pêi pro tơdroăng xôi tơdjâk troh cheăng kâ tơnêi têa, cheăng kâ krê ƀă xúa khoa hok, kŏng ngê̆, pơhlêh nếo tơmiât pêi, pơhlêh xúa kŏng ngê̆.