VOV4.Sêdang - Pơtối tơdroăng hôp rôh má 4, hâi lơ 13/10, Vi ƀan pơkuâ Kuô̆k hô̆i ăm rơkong veăng tơpui tối ‘na tơdroăng ki hbrâ ăm hneăng hôp má 2, Kuô̆k hô̆i hneăng má 15; Ăm rơkong veăng tơpui tối ‘na kơxop hlá mơ-éa Luât ki ‘mâi rơnêu, ‘mot tơ’nôm Phụ lục – Danh mục tơdroăng pơkâ riân ngăn tơnêi têa dêi Luât riân ngăn; Séa ngăn, pơkâ tơdroăng ki ‘mot tơ’nôm liăn ngân, liăn hrê tŏng kum kong têa ê hơnăm 2021 ăm kong pơlê Quảng Nam. Ki rơhêng vâ tối, Vi ƀan pơkuâ Kuô̆k hô̆i ăm rơkong veăng tơpui tối ‘na túa pơkâ xúa tơnêi dêi tơnêi têa hneăng hơnăm 2021 – 2030, troăng ngăn troh hơnăm 2050 ƀă túa pơkâ xúa tơnêi 5 hơnăm hơnăm 2021 – 2025.

Tiô hnoăng pơkuâ, Kuô̆k hô̆i cho kơ koan kĭ pơkâ xúa tơnêi hneăng hơnăm 2021 – 2030, troăng ngăn troh hơnăm 2050. Túa pơkâ xúa tơnêi dêi tơnêi têa cho túa pơkâ ki kal, tâi tâng athế prôk hdrối môi hvêa chêng, pro tíu ăm túa pơkâ kơvâ cheăng, túa pơkâ kơpong ƀă kong pơlê. Túa pơkâ xúa tơnêi dêi tơnêi têa cho vâ rak vế tơnêi pêt báu tơtro vâ rak tơniăn kring vế kế kâ tơnêi têa; tơnêi kong rak kơnhŏng têa, tơnêi kong ki chiâng xêh vâ rak vế kong prâi tơnêi tơníu, hbrâ ví ƀă kong prâi pro hơ’lêh.

Katarina Nga tơplôu ƀă tơbleăng