Kiơ̆ kơ ‘noh, tơmam đơ̆ng choh jang sa kơ Dak Lak tĕch tơ̆ teh đak đe hơnhăk ăn jên teh đak đe lơ oei jing cheh phe, đang kơ ‘noh jĭ điêu, tiu, kơ su, ‘long tơ̆r păng dôm kơ loăi plei ‘long. Mă hơdăh, 6 khei âu ki Dak Lak tĕch tơ̆ teh đak đe đei 228.000 tấn cheh phe, iŏk đei dang 485 triệu dollar, hơtŏ vă jê̆ 12 rơbâu ti; mă 2 ‘noh jĭ điều hăm 2.500 ti hlak jên; mă 3 ‘noh tiu, dang 1.800 ti hlak jên; uơ oei dơ̆ng ‘noh kơ su, dôm tơmam tơ̆r ‘long păng dôm tơmam plei ‘long, phe, mắc ca. 

Ƀok Huỳnh Ngọc Dương – Phŏ kơdră vei lăng anih jang tơbăt, vă pơ vei đei jang tŏk kŭm nhen vei sơđơ̆ng tơdrong tĕch tơ̆ teh đak đe tơmam đơ̆ng choh jang kơ Dak Lak iŏk đei 1 ti 610 triệu dollar (dang 38.000 ti hlak jên) kiơ̆ trong tơlĕch jang sơnăm 2023, anih vei lăng kơmăy kơmŏk mơdro sa tŏk bŏk hơdrin tơlĕch jang lơ grŭp trong jang tơgŭm anih mơdro sa lơ̆m tơdrong tĕch tơ̆ teh đak đe dôm tơmam đơ̆ng choh jang sa.