Kon pơlei jang pơtăm sâu riêng Krông Pach, tơ-‘ngla kơ pơm lêh, tŏk bŏk tơlĕch jang dôm tơdrong jang ‘lơ̆ng hơ iă lăng truh pơm lêh. Kon pơlei ưh khan vei lăng năng tông tơnăp vă đei plei sâu riêng ‘lơ̆ng hloh, mă lei oei pơjing đơ̆ng cham char tơmang lăng phơi rơngơp, hơvơn tơmoi chă sa hơla plei sâu riêng. Pơm lêh sâu riêng Krông Pach đei rim tơdrong pơgơ̆r tơƀơ̆p dih băl nhen: Năr lêh joh ayŏ kơdŏ soang rim hơdrung, Pơm lêh trong kơphô̆, Jơnŭm kơchơ plei ‘long, tơmam choh jang sa gĭt kăl, hơdrơ̆r tơmam drăm OCOP… ‘Moi kiơ̆ pơm lêh vă tơgoăt, tơƀôh tơbăt găh tơdrong đei, rơvơn tơmơ̆t jên jang lơ̆m choh jang sa, pơm tơlĕch păng tĕch răt plei sâu riêng tơklep hăm atŏk tơ iung joh ayŏ, tơmang pơhiơ̆ pơlei pơla.