Y Tuân Ksos, Bí thư chi bộ Plei Pa, xăh Cư Prao, apŭng M’ Drắk tơroi: Teh păng tŏ ‘mi kial tơ̆ tơring ‘nâu ưh kơ đei hiôk nhen dôm tơring nai lơ̆m apŭng. Kơtao tơ̆ dôm xăh nai iŏk yua 100 tấn 1 hek tar ‘noh hmă đĕch, oei tơ̆ âu 80 tấn đĭ lơ dêh bơih. 1 hek tar keo 7 sơnăm dôm tơring nai đei kơjă 100 triệu oei tơ̆ âu lăp 70 triệu hlak jên. Plei Pa đei 93 ŭnh hnam, hloh 1 puăt kơ sô̆ ŭnh hnam lơ̆m pơlei găh ŭnh hnam dơnuh hin. Ƀôh hơdăh lơ̆m tơdrong jang hơdrin yak klăih đơ̆ng dơnuh hin ‘noh klo kăn Y Tài Niê. Dang ei ŭnh hnam đei 20 hek tar ‘long keo đơ̆ng 2 truh 4 sơnăm, păng 8 hek tar kơttao. Pơyan âu ki 8 hek tar iŏk đei vă jê̆ 600 tấn, kơtao đei kơjă kơna đơ̆ng rŏng jô̆ đĭ jên jang hlôi lơi đei hloh 350 triệu hlak jên. Y Tài tơbăt ŭnh hnam sư hlôi tŏk iŏk jên đơ̆ng Anih mong jên vei lăng Choh jang sa păng hơtŏk tơiung tơring tơrang đơ̆ng hloh 10 sơnăm kơâu. Mưh kăl kơ răt phŏng vei lăng pơgar kơkao dăh mă răt hơdrĕch ‘long keo, thuê bơngai jang pơtăm bri ‘noh tŏk iŏk jên đơ̆ng anih mong jên. Truh pơyan koh tĕch kơtao ‘noh kla hloi jên tơm păng jên cheh. Y Tài Niê tơbăt đei đăi tơdrong jang nhen hrei ‘nâu, 1 păh ‘noh gơnang đơ̆ng jên tŏk iŏk đơ̆ng anih mong jên.

“Đơ̆ng jên tŏk iŏk đơ̆ng anih mong jên, kon pơlei nhôn mă đei jên vă tơmơ̆t jên jang sa. Đei bơngai tŏk iŏk jên vă pơtăm kơtao, pơtăm ‘long; đei bơngai tŏk iŏk jên răt rơmo vei rong. Tơdrong arih sa kơ kon pơlei lơ̆m pơlei nhôn hlôi đei lơ tơplih, hơtŏk tơiung tôch kơ lơ pơtêng hăm hơdrol sơ̆.”

Ƀok Y Lhu Bya bơngai ÊĐê oei tơ̆ plei Ko Êmông, xăh Ea Bhôk, apŭng Cư Kuin dang ei hlôi đei hnam tih ‘lơ̆ng kơjăp pơm tŏk bŏk pơgar jơk ƀĕnh cheh phe, sầu riêng. Hơdrol sơ̆ ‘ngoăih kơ tơdrong pơtăm cheh phe, ƀok Y Lhu Bya oei rong rơmo tŏk truh 40 tŏ. Mŭk drăm ŭnh hnam đei ƀôh, kon hơ ‘lơ̆p đei hŏk pơhrăm truh trơ̆p truh troch.

“Kon pơlei nhôn tơ̆ dôm pơlei kơ xăh Ea Bhôk, apŭng Cư Kuin, dêh char Dak Lak. Đơ̆ng ki sơ̆ nhôn gơnang lơ̆m jên tŏk iŏk đơ̆ng anih mong jên mă hơtŏk tơiung vei rong kon tơrong nhen rong nhŭng, rong rơmo păng tơmơ̆t jên jang răt phŏng vă vei lăng pơgar ‘long kăp gĭt. Tơdrong arih sa kơ kon pơlei nhôn sơđơ̆ng păng hơtŏk tơiung 1 păh tôch kơ lơ gơnang lơ̆m jên tŏk iŏk đơ̆ng anih mong jên.”

Mĭnh ‘nu bơngai hơgei găh pơm pơdrŏng ăn kơ dih păng tơgŭm lơ ŭnh hnam nai lơ̆m pơlei klăih đơ̆ng dơnuh hin, ‘noh jĭ ƀok Y Phơi Buôn Giá, bơngai M’ Nông oei tơ̆ plei Drên A, xăh Đắk Liêng, apŭng Lắk. Ƀok Y Phơi đei pơgar ‘long kăp gĭt să hloh 15 hek tar, lơ̆m noh đei 10 hek tar sầu riêng păng 4 hek tar tiu hlôi ăn phĕ tĕch. Sơnăm 2020 Y Phơi pơ̆n tŏk iŏk jên đơ̆ng anih mong jên 3 ti hlak jên vă tơmơ̆t jên jang vei lăng pơgar ‘long kăp gĭt păng pơtăm ‘nao 1.400 ‘long kiơ̆ kơ yuăn khan cây dổi, 1 kơ loăi ‘long pơtăm ‘nao lăp tơ̆ tơring teh ‘nâu păng pơ kă ăn iŏk yua mŭk drăm tôch kơ lơ. Y Phơi tơbăt kơ sô̆ jên tŏk iŏk đơ̆ng anih mong jên 3 ti hlak jên sơnăm 2020, dang ei gơnang đơ̆ng phĕ tĕch sầu riêng kơna hlôi kla đei 2 ti hlak jên.

“Ĭnh jang sa hơtŏk tơiung mŭk drăm đei ‘noh gơnang đơ̆ng lơ̆m jên tŏk iŏk đơ̆ng anih mong jên choh jang sa. Đei ƀơ̆t lăp ĭnh tŏk iŏk tŏk truh 3 ti hlak jên vă tơmơ̆t jên jang. Kơ sô̆ jên tŏk iŏk âu ĭnh akŏm lơ̆m pơgar ‘long kăp gĭt, găh lơ ‘noh ‘long sầu riêng. Ĭnh dai tơgŭm dôm ŭnh hnam tơ̆ plei Drên A, păng Drên B găh phŏng vă vei lăng ‘long pơtăm. Ĭnh pơm tơdrong jang ăn kơ 9 ‘nu lơ̆m pơlei jang prăt sơnăm ăn kơ ĭnh.”

Ƀok Vương Hồng Lĩnh, Kơdră Anih mong jên Agribank tơ̆ Dak Lak tơbăt: Truh 31/7/2023 rơkăh hre ăn tŏk iŏk mŭk drăm tơ̆ Agribank Dak Lak iŏk đei 17.746 ti hlak jên, tŏk 801 ti hlak jên, iŏk đei tŏk hơdrol 4,7% pơtêng hăm blŭng sơnăm.

“Anih mong jên Agribank tơ̆ Dak Lak hlôi ăn tŏk iŏk hloh 2 rơbâu ti hlak jên hăm kon pơlei kon kông, hăm hloh 10 rơbâu ŭnh hnam kon pơlei tŏk iŏk. Hăm kon jên âu kon pơlei hlôi gơh tŏk iŏk jên tôm vă pơyua ăn jang sa, tĕch mơdro kŭm nhen pơm tơlĕch ming dơ̆ng. Kon pơlei hlôi iŏk yua khoa hŏk ki thuơ̆t kơmăy kơmŏk ‘nao vă hơtŏk ‘lơ̆ng tơmam, hơtŏk iŏk yua lơ̆m kơplăh pơm tơlĕch lơ̆m tơdrong jang choh jang sa bri ‘long păng vei rong kon tơrong. Kon pơlei hlôi yua kơ sô̆ jên vă hơtŏk ‘lơ̆ng iŏk yua. Tơ̆ lơ̆m dôm tơring năm vih vơ̆t hơtăih Agribank hlôi đei dôm hơnih ăn tŏk iŏk chă năm hăm gre ô tô joăt kơjang. Tơdrong Agribank pơtruh jên vei sơđơ̆ng đei yua păng ‘lơ̆ng, tơgŭm ăn kon pơlei sut pơngot, tơ jur dơnuh hin păng klăih đơ̆ng dơnuh hin kơjăp”.