Kơsơ̆ năr 2/12, tơ̆ pơlei tơm Kon Tum, Hơnĭh tơm Pơtrŭt chŏh jang sa Teh đak jang hơdoi hăm Dơnŏ anĭh vei lăng chŏh jang sa păng Atŏk tơ iung tơring tơrang dêh char Kon Tum pơgơ̆r pơma dơnŭh hăm hơnăn: “Tơbăt dĭh băl trong jang hơ iă lơ̆m tơ iung pơjing trong bơ̆ jang kơ Khŭl pơtrŭt chŏh jang sa kon pơlei pơla tơ̆ Kon Tum”.

Vang năm đei rim bơngai joăt jang, kơdră vei lăng, tang măt ăn rim hơnĭh bơ̆ jang păng Khŭl pơtrŭt chŏh jang sa pơlei pơla tơ̆ ƀar dêh char Kon Tum păng Gia Lai. Vă rim Khŭl pơtrŭt chŏh jang sa pơlei pơla bơ̆ jang ‘lơ̆ng, tơ̆ jơ pơma dơnŭh rim bơngai tang măt 2 dêh char Gia Lai păng Kon Tum hlôi atŭm dĭh băl pơma dơnŭh găh trong chĕp pơgơ̆r, tơdrong jang kơ Khŭl pơtrŭt chŏh jang sa pơlei pơla. Tơgop nơ̆r lơ̆m rim tơdrong jang hơdăh kơ Khŭl pơtrŭt chŏh jang sa pơlei pơla nhen: Pơtho tơƀô̆h, pơtho tơbăt kih thuơ̆t hle ăn ŭnh hnam kon pơlei chŏh jang sa tơgŭm ăn atŏk tơ iung chŏh jang sa; Rim tơdrong jang tơgŭm djru, pơtho tơbăt atŏk tơ iung Hơp tak xah chŏh jang sa; Rim tơdrong jang tơgŭm djru, tơbăt ăn ŭnh hnam kon pơlei chŏh jang sa, Hơp tak xah vang tĕch mơdro, jang hơdoi lơ̆m jang chehphe păng rim tơdrong jang pơtho tơbăt jang kiơ̆ kmăi kmŏk tơplĭh kơsô̆ lơ̆m chŏh jang sa.