Tih vơ̆ djơ̆ ‘lơ̆ng lơ̆m groi teh kĕch mang Ia Hrung, apŭng Ia Grai, dêh char Gia Lai, Ksor Phiếu  iŏk ŭnh om hăm ƀar păh tơpang ti hoh. Gơnơm hơdrin jang sa păng băt chă pơkom, kơna muk drăm klo akăn mơlôh ou roi năr roi đei ƀôh. Hrei ou, Ksor Phiếu  ‘noh mĭnh lơ̆m dôm unh hnam đei ƀôh hloh lơ̆m pơlei hăm vă jê̆ 2 ha chehphe pơtăm hrou bơ̆n tiu păng rong rơmo 17 tŏ. Sơnăm ou ki, chehphe tŏk măt, ŭnh hnam ƀok jang sa iŏk đei hloh 400 triu hlak jên.

Lơ ŭnh hnam lơ̆m pơlei hlôi hŏk pơhrăm jang kiơ̆ pơtăm ‘long kăp gĭt păng rong kon tơrong kơ thôn trơng Ksor Phiếu kơna tơdrong hơrih sa đe sư roi năr roi sơđơ̆ng. Hrei ou 200 ŭnh hnam kơ pơlei, ŭnh hnam ayơ jei đei tivi, gre bơbĭt. Lơ ŭnh hnam hlôi măn đei hnam ‘lơ̆ng. Kon pơlei lơ̆m pơlei hlôi đei tơdrong hơrih sa sơđơ̆ng. Mă lei trong yơ yak lơ̆m pơlei tim rơvơn. Sơnăm 2023, thôn trơng  Ksor Phiếu  hlôi tơchĕng vă pơm trong nơnăm ou ‘noh chă apĭnh hơnih jang pơm ‘nhŏng oh hăm pơlei ‘noh Kŏng ty chehphe Ia Grai păng atŭm hăm rim ŭnh hnam tĕch mơdro lơ̆m tơring chă tơgŭm kon jên păng iung jang tơ iung pơjing ŭnh hơyuh tơ̆k hơdăh tơ̆ trong nơnăm lơ̆m pơlei. Gơnơm lơ loh kơna chă yak tơ̆ gơmăng kơ kon pơlei hlôi sơđơ̆ng. Ƀok Ksor Tĭ, bơngai kon pơlei lơ̆m pơlei Blo Dung pơma: “Đơ̆ng năr ƀok Ksor Phiếu đei pôk pơm Ƀĭ thư chi ƀô̆ jang hloi thôn trương, ƀok hlôi pơgơ̆r lơ ‘măng hop akŏm vă pơrô̆ pơrôp, pơtho tơbăt ăn kon pơlei, mă kăl đei hơdruh tơdăm, mưh đĭ et tơdrô hơlăk ‘noh ưh kơ gơ̆h vơ̆r gre, pơrô̆ hơvơn kon pơlei hŭt hloi tơdrong iŏk ŭnh om hrôih. Găh atŏk tơ iung mŭk drăm, mă kăl pơtăm chehphe păng jang ƀa đak, hrei ou hăm jang chehphe mĭnh sơnăm phĕ iŏk đei đơ̆ng 5-6 tân găr. Găh tơdrong tơ̆k hơdăh trong pơlei, lơ̆m dôm năr ou ki hơnih pơm ‘nhŏng oh hăm pơlei jei hlôi tơgŭm păng pơm 5 tŏ pil ŭnh hơyuh jơ̆ng ‘năr vă pơm hơdăh ăn trong lơ̆m pơlei”.

Rim khei, thôn trơng  Ksor Phiếu pơgơ̆r hop akom kon pơlei vă pơma dơnuh dôm tơdrong tơhlăk tơhlĭn lơ̆m hơrih sa. Tơ̆ ‘măng hop akŏm tơjê̆ ou,  Ksor Phiếu jei pơma tơƀôh rơhao găh tơdrong mĭnh ƀar ‘nu hơdruh tơdăm pơm glăi Khôi luơ̆t trong nơnăm. Ƀok atŭm hăm Khul vei lăng sơđơ̆ng pơlei Blo Dung năm truh rim ŭnh hnam athei kĭ pơkăp ưh kơ pơm glăi khôi luơ̆t sơđơ̆ng trong nơnăm. Thiếu tá Vũ Hùng Cường, Kơdră chĕp pơgơ̆r Kŏng ang tơring Ia Hrung tơbăt:“Khul kŏng ang hăm rim bơngai lơ̆m pơlei, mă kăl ‘noh ƀok Ksor Phiếu tôch tơnăp hăm tơdrong jang ou, athei rim ŭnh hnam pơkăp pơtho tơbăt khôi luơ̆t ăn rim kôn mon kon hơ ‘lơ̆p pơm kiơ̆ ‘lơ̆ng. Mă kăl ‘noh đe mĕ ƀă hlôi chơ ba kon hơ ‘lơ̆p năm hŏk tơplih ăn pơjao gre ăn kon hơ ‘lơ̆p năm hŏk”. 

Thôn trơng Ksor Phiếu tơnăp vang iung jang xek tơlang tơdrong chă tơgar dih băl, chă tơhil dih băl lơ̆m pơlei. Chă pơrô̆ hơvơn kon pơlei vang iung jang tang găn khul yoch; xut hŭt hloi tơdrong joăt iŏk ŭnh om hrôih, iŏk kơchŏng vă pơjing ăn tơdrong hơrih sa ‘lơ̆ng rŏ hơbŏ nhen lơ̆m pơlei. Ƀok Ksor Phiếu tơbăt akhan: Jĭ mĭnh ‘nu bơngai đảng viên, adoi jang thôn trơng dơ̆ng kơna dôm tơdrong yă kiơ ba jei hơdrin pơm jŭk yŭk trong hơlou, jang hơdol ‘noh kon pơlei mă ƀôh đơ̆ng noh pơm kiơ̆. “Ba chă pơtho khan ăn hơdruh tơdăm hao gre pơm kiơ̆ kơjăp Khôi luơ̆t sơđơ̆ng trong nơnăm nhen yơ̆l môk kŭp, mư̆h đĭ et tơdrô ƀier bơih ‘noh ưh kơ gơ̆h vơ̆r gre. Tôm sơnăm ‘mơ̆i mă iŏk ŭnh om, hŭt hloi dôm tơdrong joăt pă trŏ lăp păng pơtho khan ăn rim ŭnh hnam hơdrin ăn kon hơ ‘lơ̆p hŏk pơhrăm mă tôm. Mĭnh tơdrong kăl hloh dơ̆ng ‘noh, tơjê̆ ou ‘noh hơnơ̆ng ƀôh đe hơ ioh glơk kơ đak tơ̆ lơ tơring, kơna ba jei hơnơ̆ng chă pơkă ăn kon pơlei hơdrin vei lăng năng tông kôn mon kon hơ ‘lơ̆p mă tơnăp vă veh ver hơmơt đei tơdrong jĭ jơhngơ̆m đon”.

Ƀok Thái Hồng Cương, Ƀĭ thư Đảng tơring Ia Hrung akhan: Dôm tơdrong iŏk đei găh mŭk drăm-tơpôl tơ̆ pơlei Blo Dung ‘noh đei tơdrong tơgop tih tên đơ̆ng Ksor Phiếu:“Găh ƀok Ksor Phiếu hăm hơnăp jang Ƀĭ thư chi ƀô̆ pơlei ‘noh sư hơnơ̆ng tơtom chă pơtho tơbăt dôm tơdrong bơ̆ jang đơ̆ng Đảng, Khôi luơ̆t kơ Teh đak ăn kon pơlei. ‘Moi kiơ̆ lơ̆m hop akŏm chi ƀô̆, hop akŏm lơ̆m pơlei, ƀok hơnơ̆ng chă pơrô̆ hơvơn kon pơlei hŭt hloi dôm tơdrong joăt joe pă trŏ lăp. Truh dang ei tơ̆ pơlei, tơdrong jang atŏk tơ iung mŭk drăm păng sơđơ̆ng dơ̆ng kơjăp chinh trĭ lơ̆m pơlei đei sơđơ̆ng hơnơ̆ng”.

Ksor Phiếu ling lang đei kon pơlei lơ̆m pơlei Blo Dung, tơring Ia Hrung, apŭng Ia Grai, dêh char Gia Lai lui yom păng ‘mêm kơ eng.