Ƀok Nguyễn Văn Việt, Kơdră Anih jang tơlĕch nơ̆r sơkơ̆t, Anih tơm vei lăng găh choh jang sa păng hơtŏk tơiung tơring tơrang tơroi, hloh 9 khei anih choh jang sa iŏk đei jang tŏk lơ lơ̆m lơ tơdrong jang nhen: choh pơtăm; bri ‘long păng ka hơdang. Hơdai hăm ‘noh, kơjă pơm tơlĕch lơ̆m anih jang choh jang sa lơ̆m 9 khei kŭm iŏk đei lơ, dang 1,1 triệu ti hlak jên. Anih jang vei sơđơ̆ng phe ƀa tơmam sa, tĕch mơdro tơ̆ teh đak đe đei ƀôh ‘lơ̆ng, mă loi ‘noh jĭ lơ̆m khei 9, tĕch tơ̆ teh đak đe ‘long tơ̆r hlôi tŏk hơlơ̆k dơ̆ng, anih jang ka hơdang lăp jur păh lăp:

Găh hơtŏk tơiung anih tĕch mơdro đei ƀôh tôch kơ ‘lơ̆ng. Khei 9, tĕch tơ̆ teh đak đe tŏk 22% lơ̆m pơ đĭ 3 tơdrong jang choh jang sa tơm. Truh khei ‘năr âu jên tĕch tơ̆ teh đak đe tơmam choh jang sa, ‘long tơ̆r, ka hơdang hlôi iŏk đei 38,48 ti đô la Mi, lơ̆m 3 khei uơ oei dơ̆ng jô̆ pơ hlom rim khei gô tĕch tơ̆ teh đak đe dang 5 ti đô la Mi, bơ̆n gô iŏk đei dang 54 ti đô la Mi.

Ƀơm truh ‘măng dăr hơlen ‘măng mă 4 đơ̆ng Anih jang Châu Âu (EC) lơ̆m khei 10 sơnăm ‘nâu găh tang găn rôp yâu glăi, ưh kơ tơroi tơbăt păng ưh kơ kiơ̆ tơdrong hơgăt (IUU), ƀok Trần Đình Luân, Kơdră Anih vei lăng găh ka hơdang tơbăt, khei ‘năr âu ki, tơdrong jang hơlen lăng, dăr lăng đei tŭn pran, kŭm hăm ‘noh jĭ tơdrong jang kiơ̆ dôm tơdrong hơgăt găh khôi luơ̆t đei khŏm tơlĕch jang. Mă lei, tơhlăk tơ hlĭn tih hloh dang ei đơ̆ng Kơdră Anih vei lăng ka hơdang tơbăt, khei ‘năr âu ki, tơdrong jang hơlen lăng, dăr lăng đei tŭn pran, hơdai hăm ‘noh jĭ tơdrong jang kiơ̆ dôm tơdrong hơgăt găh khôi luơ̆t IUU ‘noh jĭ duk ka pơm glăi tơ̆ tơring đak dơ sĭ teh đak đe, ‘nâu jĭ tơdrong tơm tơchơ̆t truh tơdrong hăm hŭt đei the dreng đơ̆ng EC hăm ka hơdang Việt Nam dăh ưh:

 Tơ hlăk tơhlĭn ‘noh jĭ tơdrong sek phak tam mă hơtŏ băl đơ̆ng dôm tơring. Tơpă yan âu đei dôm tơring sek phak đei yua, pơm dôm trong jang pơtho tôch kơ ‘lơ̆ng, tơdrong chih hla ar rim năr vei lăng duk mơ̆t lĕch đei tŏk mă lei tam mă đei 100%. Găh tơdrong ‘nâu gô hơnơ̆ng bơ̆jang kiơ̆ tơdrong hơgăt đơ̆ng khôi luơ̆t: đơ̆ng vei lăng duk mơ̆t duk lĕch, tơmam dăr hơlen tơdrong pơvei kơ măy dăr lăng duk kơdâu păng roi tơbăt tơmam tơ̆ hơnih duk dơ̆ng.

Kiơ̆ kơ dră Anih tơm vei lăng găh choh jang sa păng hơtŏk tơiung tơring tơrang Phùng Đức Tiến, tơ̆ hơnăp dôm tơdrong mơmat tat long nol, Anih tơm vei lăng găh choh jang sa păng hơtŏk tơiung tơring tơrang hơnơ̆ng hơtŏk đei yua hơmet ming ‘long pơtăm kon tơrong, pơm hiôk dôm kon jên hơtŏk tơiung ăn jang sa, pơm tơlĕch păng tĕch tơmam choh jang sa. Sơnăm 2023, anih jang choh jang sa gô jang đang, hơnơ̆ng jĭ tơdrong ‘lơ̆ng kơ mŭk drăm. Vă iŏk đei tơdrong hơgăt tơlĕch ăn, Anih tơm băt hơdăh 10 trong jang tơm, lơ̆m noh tŭn hơtŏk tơdrong jang pơtrŭt lơ̆m lơ anih tĕch mơdro vă jang đang pơ đĭ găh jang tŏk păng tĕch tơ̆ teh đak đe:

 Bơ̆n akŏm lơ̆m tơdrong đei yua ‘lơ̆ng đơ̆ng anih tĕch mơdro păng anih jang tơmam, 2 tơdrong ‘nâu athei năm hơdai hăm băl kiơ̆ lơ̆m pơgơ̆r pơm tơlĕch păng đei tơmam đơ̆ng hơdrol. Thoi noh ‘noh jĭ dôm anih tĕch mơdro hlôi đei tơdrong hơgăt ‘lơ̆ng păng bơ̆n hlôi ƀrư̆ ƀrư̆ mơ̆t jang ‘noh bơ̆n gô tŭn pran păng lui ngeh pă jor akhan tơdrong hơgăt ‘noh 54 ti truh 55 ti đô la kơ sơnăm ‘nâu mă khŭl kơdră teh đak, Thủ tướng pơjao ‘noh anih vei lăng choh jang sa gô jang đang.

Kŭm tơ̆ jơ hop akŏm tơroi tơbăt hăm khŭl chih kơtơ̆ng ang, yă Nguyễn Thị Thu Hương, Phŏ Kơdră Anih vei lăng ‘long pơtăm tơbăt, hăm 74 kơ sô̆ pơkăp tơring pơtăm păng 40 anih tăh hơmet đei iŏk pơ dreo ‘noh yua đơ̆ng păih Việt Nam kơchăng bơ̆jang. Tơdăh đei dôm teh đak răt tơmơ̆t iŏk pơ dreo ‘noh gô tôch kơ mơmat tat lơ̆m tơdrong hơmet pơ ‘lơ̆ng, ƀơm ưh kơ ‘lơ̆ng tôch kơ tih truh pơm tơlĕch tơmam đơ̆ng choh jang sa.