Lơ̆m noh kơjă tơmam jang đei tŏk, vang tơgop pơm hơtŏk kơsô̆ jên iŏk đei đơ̆ng tĕch tơmam tơ̆ teh đak đe kơ dêh char, hơnơ̆ng tơƀôh hơdăh hơnăp jang gĭt kăl lơ̆m trong jang mŭk drăm kơ dêh char. Sơnăm 2024, yă dôm kơloăi tơmam đơ̆ng choh jang tơ̆ Đắk Lắk hơnơ̆ng tŏk kơjung. Yă chĕh phe, tiu đei khei ‘năr tŏk tôch kơjung. Tơdrong ‘nâu vang tơgop pơm hơtŏk iŏk yoa ăn kon pơlei, anih tĕch mơdro, pơjing tơdrong ‘lơ̆ng vă pơm hơtŏk kơjă tơmam.

Tơdrong choh jang xa kơ dêh char lơ̆m sơnăm lăp hăm tơdrong đei tơlĕch. Choh jang xa, pơtăm ‘long păng rong ka hơdang iŏk đei hlŏh 23.450 ti hlak jên, tŏk hlŏh 4% pơting hăm khei âu sơnăm sơ̆, lơ hlŏh 0,65% nơ̆r hơgăt. Tơmam đơ̆ng choh jang xa Đắk Lắk đei tĕch tơ̆ hlŏh 70 teh đak, iŏk đei vă jê̆ 1,7 ti USD.

Ƀok Nguyễn Hoài Dương, Kơdră Anih vei lăng choh jang xa păng atŏk tơiung tơring tơrang dêh char Đắk Lắk ăn tơbăt: Sơnăm 2025, anih choh jang xa adrin hơtŏk kơjă tơmam đơ̆ng choh jang xa, jang ‘long rong ka hơdang đei hlŏh 24.700 ti hlak jên, tŏk hlŏh 5% pơting hăm sơnăm 2024. Vă jang đei tơdrong ‘nâu, dêh char vă hơnơ̆ng hơtŏk tơdrong ‘lơ̆ng ăn tơmam, pơm lăp hăm tơdrong hơgăt tĕch mơdro tơ̆ teh đak đe.