Pơm dôm chơng rơng sơ̆k tơ̆ kơpal pơbŭng hnam hơnih đei măt ‘năr kĕ pơchrang, jĭ tơdrong ƀônh kơ lăng ƀôh lơ̆m trong pơm ‘nhĕm rơmo sơ̆k 1 năr kơ anih jang Tuấn Hậu, thị trấn Phú Túc, apŭng Krông Pa. Kơ nglat ‘nhĕm rơmo tŏ tơpang ti đei rơih đơ̆ng ‘nhĕm ‘lơ̆ng hloh, ưh kơ đei hrou rơmă, đơ̆ng rŏng kơ tăh tôm bơ̆n ƀoh, kơ dĭm, toi, hơmrĕ hơ ngiĕng păng plăng ưp lê̆ dang 60 pơnĭt, gô đei iŏk sơ̆k tơ̆ chơng rơng đơ̆ng 3- 4 jơ. Ƀok  Trần Quang Tuấn - Tơ ‘ngla hơnih pơm, tĕch ‘nhĕm rơmo sơ̆k 1 năr Tuấn Hậu roi tơbăt, mĭnh năr tŏ ‘lơ̆ng, sư sơ̆k 2 ‘măng, đơ̆ng 9jơ truh 12 jơ ‘năr dơ̆ng păng đơ̆ng 12 jơ truh 3jơ kơsơ̆. Ƀok Tuấn roi tơbăt, đơ̆ng 1 tơmam sa hmă kơ kon pơlei bơngai Jrai kơtă hơnih, ‘nhĕm rơmo sơ̆k 1 năr Krông Pa dang ei đĭ đei tĕch jơ̆p jang tơ̆ anih tĕch mơdro: “Tơmam ‘nâu pơtơm đơ̆ng tơmam sa hmă kơ bơngai Jarai, đơ̆ng noh mih ma duch nă iŏk ‘noh vă pơm tơmam sa ăn tơmoi lơ̆m khei ‘năr hơdrol sơ̆. Hơdrô̆ găh tăh tơmam bơ̆n ƀoh ngok ‘noh nhôn tăh tơmam bơ̆n ƀoh ngok kiơ̆ hơdrô̆ ŭnh hnam nhôn, mă ưh kơ hơdai lơ̆m anih tĕch mơdro, pha hơdrô̆ thoi noh. Rim ‘măng đei pơgơ̆r lêh găh dôm tơmam đơ̆ng kon pơlei pơm đei ‘noh ŭnh hnam đei vang akŏm. Đeijơnŭm kơchơ hơvơn truh ‘noh ĭnh gô hơdrin vang akŏm vă roi tơƀôh dôm tơmam âu truh bơngai răt yua đei ‘lơ̆ng hloh”.

Kŭm hăm anih pơm, tĕch Tuấn Hậu, lơ ŭnh hnam tơ̆ apŭng Krông Pa kŭm vang pơm tơlĕch ‘nhĕm rơmo sơ̆k 1 năr, pơjing đei dôm hơnăn ‘lơ̆ng păng đei hla ar pơkăp ‘noh tơmam OCOP kơ tơring. Yă Hồ Thị Mười – Tơ ‘ngla hơnih pơm, tĕch Mười Đức thị trấn Phú Túc, apŭng Krông Pa đĭ đei tơdrong hlôh vao vă jê̆ 30 sơnăm pơm tơlĕch ‘nhĕm rơmo sơ̆k 1 năr. Kiơ̆ kơ yă Mười, mĭnh năr, anih pơm, tĕch kơ yă pơm tơlĕch dang 50kĭ ‘nhĕm rơmo hơdrih. Khei ‘năr jê̆ tết đei năr pơm đơ̆ng 5 truh 7 tạ ‘nhĕm rơmo vă tĕch ăn dôm anih tĕch mơdro, hơnhăk ăn iŏk yua lơ:  “Hrei ‘nâu, ‘noh ŭnh hnam kŭm tŏk bŏk đei 3 hơ nglŏng apŭng asong păng vă jê̆ truh apŭng kŭm đei athei ĭnh tŏk 4 hơ nglŏng, tơmam nhôn yak tŏk dôm tơdrong ‘lơ̆ng hloh, tơmam kŭm ‘lơ̆ng hloh, vă kơ tĕch tơ anih mơ dro păng nhôn kŭm iŏk đei 4 hơ nglŏng vă kiơ̆ naih tĕch mơdro lơ̆m teh đak. Yua kơ jơhngơ̆m jăn đơ̆ng bơngai răt yua nhôn kŭm lăng truh ‘noh jĭ tơdrong rơgoh ‘lơ̆ng đơ̆ng tơmam sa păng tơmam ‘lơ̆ng hloh.”

Mŏ Hoàng Thị Minh Châu, oei tơ̆ trấn Phú Cần, apŭng Krông Pa kŭm jing bơngai hơnơ̆ng răt rơmo sơ̆k 1 năr vă asong ŭnh hnam tơ̆ pơlei mưh năr Tết vih: “Inh tôch kơ ‘meh sa ‘nhĕm rơmo sơ̆k 1 năr tơ̆ Krông Pa, Gia Lai, yua kơ rơmo tơ̆ âu đei ƀâu phu ‘lơ̆ng, đei sơ̆k hăm ‘năr tŏ tôch kơ dêh, sa đei ƀăt ‘lơ̆ng hơdrô̆. Rim sơnăm vă jê̆ tết ‘noh ĭnh đa răy dôm kĭ brŏk pơm tơmam asong ăn kơ bơngai ŭnh hnam, ƀok yă, mĕ ƀă, ‘nhŏng mŏ oh.”

Lơ̆m apŭng Krông Pa đei dang 30 hơnih pơm tơlĕch ‘nhĕm rơmo sơ̆k 1 năr. Lơ̆m akŏm kơsô̆ 29 tơmam Ocop kơ apŭng, đei 20 tơmam đei pơm đơ̆ng ‘nhĕm rơmo nhen rơmo hek iơ iĕ, rơmo hơ pôm, kơ ting mir rơmo sơ̆k 1 năr, rơmo phang tơ̆ hơ gra ŭnh.... Ƀok Nguyễn Đình Nhung - Kơdră Khŭl vei lăng kon pơlei jang chŭn mir apŭng Krông Pa roi tơbăt vă tơgŭm ăn kon pơlei hơtŏk tơiung pơih să pơm tơlĕch păng tĕch mơdro khŭl vei lăng kon pơlei jang chŭn mir apŭng jang hơdai hăm dôm anih jang, tơring tŭn pran tơroi tơbăt pơtho kon pơlei hơdrin vang jang tơdrong jang Ocop pơm tơdrong hiôk vă dôm tơ ‘ngla tơmam đei tơdrong hiôk roi tơƀôh tơmam, pơih să tĕch mơdro: “Rim sơnăm ‘noh khŭl vei lăng kon pơlei jang chŭn mir apŭng oei đei trong tơlĕch jang pơjing dôm tơdrong jang, mă loi ‘noh lơ̆m tơdrong jang mă hơnhăk tơmam năm vang tĕch tơ̆ dôm ‘măng kơchơ tĕch tơmam đơ̆ng choh jang sa yua đơ̆ng khŭl vei lăng kon pơlei jang chŭn mir dêh char pơgơ̆r, đang kơ ‘noh dôm apŭng nai pơgơ̆r kŭm thoi noh. Athei khŭl vei lăng kon pơlei tơ̆ tơring pơgơ̆r ăn dôm ŭnh hnam pơm tơlĕch tĕch mơdro hơgei, mă loi ‘noh jĭ dôm ŭnh hnam đei tơmam Ocop, tơmam tĕch lơ̆m điện tử”.

Hăm akŏp rơmo hloh 64.000 tŏ, lơ̆m noh găh lơ ‘noh jĭ rơmo hmă, Krông Pa tŏk bŏk hơtŏk ‘lơ̆ng tơdrong đei yua găh tơmam ‘lơ̆ng. Tơdrong hơdai hăm tŏ kial hiôk, ki thuơ̆t pơm tơlĕch hơdrô̆ păng dôm tơdrong jang hlôi tơgŭm anih jang pơm tơlĕch ‘nhĕm rơmo sơ̆k 1 năr jing tơdrong jang hơnhăk ăn kơjă mŭk drăm lơ ăn kon pơlei tơring.

 Đơ̆ng rŏng âu ‘nŏh nhôn pơma nuh hăm ƀok Võ Ngọc Châu, Kơdră Anih vei lăng choh jang xa păng atŏk tơiung tơring tơrang apŭng Krông Pa vă băt hơdăh ƀiơ̆ tơdrong ‘lơ̆ng, trong vă jang tŏk ‘nhĕm rơmo sơ̆k pơkro 1 năr tơ̆ tơring tơ̆ hơnăp kơnh.

-Apinh bơnê kơ ih ƀok Võ Ngọc Châu, Kơdră Anih vei lăng choh jang xa păng atŏk tơiung tơring tơrang apŭng Krông Pa vang pơma nuh hăm nhôn năr ‘nâu. Apinh ih roi tơbăt tơdrong vă tưk tơiung ‘nhĕm rơmo sơ̆k pơkro 1 năr tơ̆ tơring bơ̆n năng?

-Ƀok Võ Ngọc Châu: ‘Nhĕm rơmo sơ̆k pơkro 1 năr Krông Pa jĭ tơmam đei ư hơnhang kơ apŭng Krông Pa. Tơmam đei chih pơjing kiơ̆ hơnăn ‘nhĕm rơmo Krông Pa, Gia Lai. Đei Anih vei lăng tơdrong pơchĕh rơgei chih tơbăt tơ̆ kơsô̆ 1319237 ‘năr 18/3/2022, tơmam đei pơjing kiơ̆ đơ̆ng tơdrong ‘lơ̆ng đơ̆ng 64 rơbâu tŏ rơmo đei rong, dơ̆ng hơdrol lơ̆m dêh char Gia Lai, mă lơ ‘nŏh jĭ rơmo kơtă tơ̆ tơring, rong kiơ̆ trong kron păng hơchăng chă xa hai lơ̆m apŭng kơna gơ̆h ‘lơ̆ng. Gơnơm thoi noh mă ‘nhĕm rơmo ƀou phu ‘lơ̆ng, kŭm hăm ‘nŏh jĭ ‘năr tŏ hang, phang pơđăng kơ tơring Krông Pa kŭm tôch ‘lơ̆ng vă sơ̆k pơkro ‘nhĕm ƀou phu ‘lơ̆ng, tơdrong ‘nâu tơring nai ưh kơ đei. Dang ei, tơ̆ apŭng Krông Pa đei 30 tơmam xa đei pơm đơ̆ng ‘nhĕm rơmo, mă loi lơ̆m noh đei 2 tơmam OCOP đei chih tơbăt 4 sơ ‘nglŏng kơ dêh char. Yoa thoi noh ‘nâu kŭm jing tơdrong ‘lơ̆ng, hơđơ̆ng jơhngâm vă jang tŏk, tưk tơiung anih tĕch mơdro đơ̆ng apŭng Krông Pa.

-Lei kiơ̆ ih, tơdrong kiơ mă pơm ăn ‘nhĕm rơmo sơ̆k pơkro 1 năr Krông Pa roi ‘lơ̆ng ƀiơ̆?

-Ƀok Nguyễn Ngọc Châu: Tơdrong pơm ăn ‘nhĕm rơmo sơ̆k pơkro 1 năr Krông Pa roi ‘lơ̆ng ƀiơ̆ ‘nŏh yoa lơ tơdrong. Blŭng a jĭ tơmam hiĕm, rơmo đei rong tơ̆ âu tơtă rơmo kơtă tơ̆ tơring ngăl, rong hơchăng chă xa ‘ngiĕt kơdih tơ̆ tơring đei tŏ phang lơ. Tơdrong ‘nâu tơgŭm ăn rơmo tih bek, ‘lơ̆ng, ‘nhĕm kơdăl, ƀăt ‘lơ̆ng păng ƀou phu. Tơdrong sơ̆k pơkro ‘nhĕm rơmo 1 năr đei pơm kiơ̆ tơdrong juăt sơ̆k pơkro đơ̆ng sơ̆ ‘nŏh jĭ sơ̆k phang 1 năr, pơm ăn ‘nhĕm oei ƀou phu ‘lơ̆ng. Trong pơm thoi âu tơgŭm ăn ‘nhĕm rơmo đei sơ̆k hrĕng, mă lei ‘nhĕm oei ƀou phu ‘lơ̆ng thoi ‘nhĕm rơmo sơ̆k 1 năr kơ dôm tơring nai đĕch. ‘Ngoăih kơ ‘nŏh đei dơ̆ng 1 tơdrong pơm ăn ‘nhĕm rơmo sơ̆k 1 năr Krông Pa ‘lơ̆ng,  ‘nŏh jĭ tơdrong juăt tơ̆ tơring păng tơmam xa jrăh jrai pơm ăn lơ bơngai ‘mĕh truh tơmang lăng păng răt xa. Dôm tơdrong ‘nâu vang tơgop pơjing đei ‘nhĕm rơmo ƀou phu ‘lơ̆ng păng đei ư hơnhang lơ̆m păng ‘ngoăih kơ dêh char.

-Mưh lei khul kơdră tơring păng anih jang kơpal tơ̆ tơring vă tơgŭm tưk tơiung ‘nhĕm rơmo sơ̆k pơkro 1 năr thoi yơ tơ̆ hơnăp kơnh?

-Ƀok Nguyễn Ngọc Châu: Rim sơnăm, Anih vei lăng kon pơlei apŭng pơtho ăn dôm anih jang kơpal pơgơ̆r bơ̆n kơchơ tĕch tơmam đơ̆ng choh jang xa tơ̆ apŭng vă roi tơbăt tơmam ‘nhĕm rơmo sơ̆k pơkro 1 năr. Rim sơnăm, apŭng athei tơ ‘ngla dôm tơmam OCOP năm roi tơbăt hơnăn tơmam tơ̆ tơring păng tơ̆ ‘ngoăih kơ dêh char, năm hloi tơ̆ dôm dêh char, plt nai. Tơdrong tơm ‘nŏh vă roi tơbăt hơnăn tơmam, ‘nhĕm rơmo sơ̆j pơkro 1 năr Krông Pa truh hăm dôm tơring nai. Vă jang atŏk tơiung kơjăp, apŭng, đei trong tơgŭm găh ki thuơ̆t pơm hăm kơmăy ‘nao vă hơtŏk kơjă đei ư hơnhang ăn tơmam, pơih xă anih tĕch mơdro păng atŏk tơiung tơdrong jang hơdoi đơ̆ng pơm tơlĕch truh tĕch mơdro. ‘Nhĕm rơmo sơ̆k 1 năr Krông Pa ưh lăp tơmam ‘lơ̆ng tơ̆ tơring đĕch mă oei pơjing jơhngâm pran vă tưk tơiung mŭk drăm păng roi tơbăt um ai kơ apŭng dơ̆ng.

-Lei a, bơnê kơ ih hơ!