Hăm muh măt gleh lap yoa tep ưh kơhrăp, hơdai hăm jơhngâm blĕk, ƀok Nguyễn Văn Tấn (tơ̆ thôn 8, xăh Ia Tô, apŭng Ia Grai, dêh char Gia Lai) ăn tơbăt, kơmăng hei unh hnam ƀok bơngai mât tơtông 2 vât. Cham sơ̆k đei var rơsô, hnam ƀât tŏk bŏk pơlei dơ̆ng mă lei lu bơngai tơtông oei pơ̆n mât tơtông chĕh phe oei sơ̆k tơ̆ cham đĕch. Unh hnam ƀok đei 3ha cheh phe, kơplăh dang ei đĭ phĕ đei hlŏh 1 puăt bơih, hăm dang 25 tân plei hơdrih oei sơ̆k ƀât cham.

Kiơ̆ ƀok Tấn, yă chĕh phe sơnăm ‘nâu tôch măk, 1 ƀao đei truh kơtriu hlak jên pơm ăn lu bơngai tơtông chă trong tơtông mă ưh đei hli kiơ: “Dang ei 1 ƀao chĕh phe hơdrih đei hlŏh 1 triu dôm, oei chĕh phe găr vă jê̆ truh jĭt triu kơna tam mă đei sơnăm yơ lu bơngai tơtông nuih nhen sơnăm ‘nâu, tơ̆ kơmăng lu bơngai tơtông plŏng mât tơ̆ cham sơ̆k vă tơtông chĕh phe. ‘Nao kơmăng hei đĕch, 2 vât nhôn athei druh rôp lu bơngai tơtông. Tơ̆ pơgar ‘nŏh đe gơ̆ hŭt dơng sơdrai, gơ̆ đang đe pleh plei tơ̆ mum pơgar, đei hloi bơngai tung tơtông ƀao chĕh phe.”

Kŭm hăm Gia Lai, dôm dêh char Tây Nguyên oei mât lơ̆m pơyan phĕ chĕh phe ‘năi. Hơiă yoa yă tŏk tôch dêh (jur tŏk đơ̆ng 120-130 rơbâu hlak jên 1 kĭ găr) mă lei kon pơlei tơ̆ lơ tơring kŭm tôch pơngơ̆t hli kơ đe tơtông hai. Ƀok Nguyễn Văn Quý, tơ̆ plei Thanh Lâm, xăh Đức Minh, apŭng Đắk Mil, dêh char Đắk Nông ăn tơbăt, 1,2 tơdrong tơtông hlôi đei pơm ăn mih ma duch nă sŏng xa pă lŭ, tep pă nĭt lơ̆m pơyan phĕ ‘nâu: “Sơnăm ‘nâu yă chĕh phe tŏk tôch kơjung, kon pơlei tơ̆ âu đei 1,2 tơring đe phĕ tơtông bơih. Hơpơi ‘mĕh khul vei lăng ‘lơ̆ng nhen dôm sơnăm sơ̆, bơ̆ jang ‘lơ̆ng tơdrong jang kơdih tơ̆ xăh Đức Minh”

Kŭm hăm pơgar ‘long, cham sơ̆k kơ kon pơlei, dôm bơngai tơtông oei chă trong tơtông tơ̆ dôm anih mir đak lar, công ty jang chĕh phe, dôm anih mong akŏm chĕh phe ‘nao phĕ. Ƀok Đỗ Giao Hưởng, Kơdră chjĕp kơ̆l Công ty jang chĕh phe Ia Blan, apŭng Ia Grai, dêh char Gia Lai ăn tơbăt, tơdrong tơtông chĕh phe pơyan phĕ ‘nâu tôch dêh, roi krê hlŏh dơ̆ng, pơm ăn công ty tôch pơngơ̆t păng chă trong tang găn. Kơplăh dang ei, đe ƀok kơdră păng công nhân bơngai jang lơ̆m công ty đei krao akŏm vang năm dăr joang, vei lăng pơgar ‘long păng anih mong chĕh phe rim măng.

“Nhen thoi kơmăng hei, đei 4 ‘nu bơngai, dang 11-12 jơ kơmăng mât tơ̆ anih sơ̆k chĕh phe công ty, tôch pŭn khul vei lăng ƀôh kơna lu sư kơdâu ôn. Sơnăm ‘nâu yă tŏk tôch lơ, lơ hlŏh đơ̆ng sơ̆ truh dang ei kơna tơdrong tơtông chĕh phe kŭm đei ‘năi. Đơ̆ng blŭng pơyan phĕ nhôn jang hơdoi, krao Công an xăh păng athei khul kơdră tơring vang tơgŭm lơ̆m tơdrong vei lăng pơgar ‘long.”

Vei lăng pơgar ‘long, tơmam kon pơlei lơ̆m pơyan phĕ pơma atŭm, chĕh phe pơma hơdrô̆ đei công an dôm dêh char Tây Nguyên tơlĕch jang hơnơ̆ng. Mă lei, tơdrong sơđơ̆ng lơ̆m pơyan phĕ chĕh phe sơnăm ‘nâu roi krê ƀiơ̆, yoa thoi noh, công an dôm tơring hlôi kơchăng hơtŏk khul linh, jang hơdoi kơjăp hăm kon pơlei păng khul vei lăng, pơgơ̆r dăr joang – vei lăng, mă loi lơ̆m pơyan phĕ chĕh phe đum.

Trung tá Đồng Thị Lâm, Yŏng công an xăh Đức Minh, apŭng Đắk Mil, dêh char Đắk Nông ăn tơbăt: “Hăm tơdrong vei lăng chĕh phe ‘nŏh hơnơ̆ng rim sơnăm công an xăh roi tơƀôh, tơlĕch trong bơ̆ jang. Mă lei, năng kiơ̆ yăn âu, sơnăm ‘nâu, ‘ngoăih kơ ăn 6 khul vei lăng tơ̆ mir pơgar kiơ̆ tơring, 1 khul jang đơ̆ng công an xăh ‘nŏh kŭm đei hloi dôm khul vang truh dăr joang hai.”

Tơ̆ apŭng Ia Grai, dêh char Gia Lai, Trung tá Trương Ngọc Ánh – Kơdră vei lăng Khul roi tơƀôh kơ Công an apŭng ăn tơbăt, tơdrong vei lăng pơgar chĕh phe kon pơlei đei bơ̆ jang kiơ̆ lơ tăl: “Hăm trong jang “tang găn tơ̆ mir pơgar, tang găn đơ̆ng tơring”, nhôn pơgơ̆r dăr joang kiơ̆ 3 tăl: tăl tơ̆ lăm jĭ khul vei lăng sơđơ̆ng, tăl mă 2 ‘nŏh công an xăh, păng tăl tơ̆ ‘ngoăih ‘nŏh jĭ công an apŭng. Hơdai hăm ‘nŏh, nhôn vang pơgơ̆r dăr joang hơdai, vă bơ̆ jang tơdrong jang đei pơjao hai vă vei lăng sơđơ̆ng ‘lơ̆ng pơgar ‘long ăn kon pơlei hai.”./.