Anih jĭ đei tơ̆ 2 unh hnam lơ̆m thôn 11 păng thôn 5 xăh Ea Kly. Lơ̆m nŏh anih jĭ hơ drol đei ƀôh lơ̆m ‘năr 29/10 tơ̆ unh hnam ƀok Nguyễn Nhu Lực, tơ̆ thôn 11 hăm vă jê̆ 800 tŏ iĕr bip jĭ. Anih jĭ mă 2 ƀôh lơ̆m ‘năr 5/11, tơ̆ unh hnam ƀok Ngô Đức Tình tơ̆ thôn 5, hăm 750 tŏ iĕr bip jĭ, lơ̆m nŏh đei 500 tŏ bip păng 250 tŏ iĕr.

Đơ̆ng rŏng iŏk đei nơ̆r tơ roi găh anih jĭ toi, kăn bô̆ jang thŭ y truh iŏk set hơ len pham, mă hơ tuch ăn ƀôh đei virus jĭ toi A/H5N1. Anih vei lăng rong kon tơ rong păng jang thŭ y jang hơ doi hăm khul kơ dră tơ ring pơ gơ̆r sŏh, ƀŭ hŭt đĭ đăng iĕr bip jĭ; pruih pơ gang pơ lôch pơ rang jĭ tơ̆ hnam rong, jum dăr anih ƀŭ hŭt păng lơ̆m tơ ring đei jĭ. Anih vei lăng rong kon tơ rong păng jang Thŭ y dêh char Dak Lak ƀơk 36 kơ lich pơ gang vă tơ ring pơ gơ̆r pruih pơ lôch pơ rang jĭ; jang hơ doi hăm Anih vei lăng jĭ jăn dêh char Dak Lak khăm hơ len jĭ toi, hơ mơt tơ pŏh tơ̆ bơ ngai lơ̆m xăh Ea Kly.