Hlôi đei dơ̆ng 14 tơmam drăm đei hơlen trŏ lăp hăm pơkăp ‘lơ̆ng 4 hơnglŏng, pơm hơtŏk tơmam drăm OCOP kơ Dak Lăk tŏk truh 254. 14 tơmam drăm iŏk đei pơkăp ‘lơ̆ng 4 hơnglŏng kơ dêh char ‘noh: Socola nhân macca, Pŭk cacao hmă kơ Kŏng ty Nam Trường Sơn (apŭng Krông Ana); tơmam drăm găr macca hơđang, klong plei macca, klong macca sầu riêng, sầu riêng sơ̆k kơ Kŏng ty Macca Dak Lăk ( Thĭ xah Ƀuôn Hô); rim tơmam drăm yến chưng kơ Kŏng ty Thành Dung (apŭng Krông Pach) păng tơmam drăm sầu riêng DONA pơkrot kơ Hơp tak xah Choh jang sa rơgoh ‘lơ̆ng Krông Pach. Hơnih vei lăng kon pơlei dêh char Dak Lăk tơbăt, tơdrong jang OCOP tŏk bŏk roi năr roi hơvơn đei lơ kon pơlei choh jang sa, hơnih mơdro sa, hơp tak xah vang iung jang, pơjing hơyak pran ăn tơdrong jang mŭk drăm tơ̆ tơring choh jang sa atŏk tơ iung pran kơtang, tơgop pơm hơtŏk kơjă tơmam drăm, pơm hơtŏk jang sa đei iŏk yua kơjăp ăn kon pơlei.