Dang 2 khei ‘nâu, tơdrong pơm ƀơk Kơsô̆ chih tơbăt tơring pơtăm sầu riêng vă tĕch tơ̆ tĕh đak đe tơ̆ dêh char Dak Lak tơƀâp pơmat tat, tơhlăk tăk, hăm vă jê̆ 40 blăh hô sơ oei tam mă pơm. Dêh char oei hơ tŏk lơ trong jang hơmet pơ ‘lơ̆ng vă pơjing dơ̆ng lơ tơring pơtăm sầu riêng đei tôm tơdrong kăl vă tĕch tơ̆ tĕh đak đe kiơ̆ trong tĕch tơpăt, tom hăm pơyan phĕ pơtơm đơ̆ng khei 8 truh. Kiơ̆ ƀok Lê Văn Thành, Kơdră Anih vei lăng rei pơtăm păng ‘long pơtăm Dak Lak, gô đei dang 9000 ha sầu riêng tơ̆ dêh char mât lơ̆m pơyan phĕ plei đơ̆ng khei 8 truh. Lơ̆m nŏh, dêh char ‘nao ƀơk đei 63 Kơsô̆ chih tơbăt tơring pơtăm, akŏm đĭ đăng tĕh xă dang 2.000ha.

Vă hơtŏk hrĕnh tơdrong pơm ƀơk Kơsô̆ chih tơbăt tơring pơtăm, Anih vei lăng kon pơlei dêh char Dak Lak pơjao tơdrong dăr lăng, truh hơlen tơring pơtăm ăn dôm anih vei lăng choh jang xa, tơring tơrang tơ̆ apŭng; pơjao ăn Anih rei pơtăm păng vei lăng ‘long pơtăm dêh char pơgơ̆r pơtâp pơhrăm ăn rim kăn ƀô̆ bơ̆ jang găh tơdrong ‘nâu. Ƀok Lê Văn Thành ăn tơbăt, kŭm hăm sầu riêng, Dak Lak đei trong jang vă ƀơk Kơsô̆ chih tơbăt tơring pơtăm ăn rim kơloăi ‘long pơtăm ‘lơ̆ng tơ̆ tơring hai, kơna tơdrong pơtâp pơhrăm, pơm ƀơk, vei lăng Kơsô̆ chih tơbăt tơring pơtăm gô đei bơ̆ jang hrĕnh ‘lơ̆ng.