Hlŏh 1 khei ‘nâu, bơngai pơdro hơnơ̆ng pơma nuh hăm ƀok Lê Văn Thành tơ̆ plei Phước Hoà, xăh Ea Yông, apŭng Krông Pach, dêh char Đắk Lắk vă chôt yă sầu riêng lơ̆m pơgar xă hlŏh 2 hec-ta đe ƀok. Mă lei ƀok Lê Văn Thành ăn tơbăt, mă đơ̆ng yă bơngai pơdro ‘mĕh răt lơ ră, jur tŏk đơ̆ng 70.000- 85.000 1 kĭ ăn plei sầu riêng Dona mă lei ƀok oei ưh tĕch: “Dang ei tơ̆ âu pơma atŭm đe chôt lơ yă dêh. Hăm unh hnam nhôn oei dang 5 - 10 năr ‘nŏh phĕ, kơplăh âu kơnh unh hnam chôt yă vă vei lăng ‘lơ̆ng ăn plei sâu riêng ‘nâu păng vă tĕch đei kơjă sơđơ̆ng ƀiơ̆ ‘năi”.

Jĭ 1 lơ̆m 2 tơring tơ̆ Đắk Lắk đei Anih vei lăng tơmam pơcheh rơgei, Anih tơm jang Khoa hŏk – Kơmăy kơmŏk ƀơk ăn hla ar chih tơbăt “Hơnăn sầu riêng atŭm”, apŭng Krông Pach oei adrin pơjing, tơƀôh hơdăh hơnăn đei ư hơnhang kiơ̆ đơ̆ng tơmam ‘lơ̆ng. Ƀok Trần Hồng Tiến, Bí thư Đảng apŭng ăn tơbăt, hăm teh pơtăm xă hlŏh 8.000 hec-ta, pơyan phĕ ‘nâu, rŏ năng plei ‘long lơ̆m apŭng gô iŏk đei hlŏh 92.000 tấn. Păng chih iŏk dôm tơdrong kăl đơ̆ng pơyan adrol sơ̆, 1,2 lô tơmam sầu riêng đơ̆ng Việt Nam đei păih Trung Quốc pơdreu dơ̆ng yoa ưh đei pơm lăp hăm tơdrong hơgăt plei ‘lơ̆ng, apŭng oei hơtŏk tơdrong jang ‘nâu: “Apŭng oei akŏm jơhngâm pơtho vei lăng ‘lơ̆ng kơsô̆ hơgăt tơring pơtăm. Mă loi ‘nŏh athei đei hla ar chih găh khei ‘năr vei rong kiơ̆ tơdrong hơgăt rơgŏh ‘lơ̆ng. Mă 2 ‘nŏh nhôn oei akŏm jơhngâm hơtŏk tơdrong krao hơvơn kon pơlei pơtăm sầu riêng kiơ̆ trong rơgŏh, jang đei plei ‘lơ̆ng, đei đe lui hlŏh thoi noh vă gơ̆h jang atŏk tơiung sầu riêng kơjăp ‘lơ̆ng”.

Lơ̆m dêh char đei 23 anih tăh tơpu păng 68 tơring pơtăm đei ƀơk ăn kơsô̆ hơgăt vă tĕch mơdro tơ̆ teh đak đe. Apŭng đei Anih vei lăng tơmam pơcheh rơgei ƀơk ăn Hla ar chih tơbăt hơnăn sầu riêng atŭm ‘nŏh jĭ Krông Pach păng Cư Mgar. 2 apŭng oei chih pơjing hla ar vă vei lăng hơnăn tơmam Krông Buk păng EaHleo. Kiơ̆ ƀok Nguyễn Văn Hà, Phŏ Kơdră Anih vei lăng choh jang xa păng atŏk tơiung tơring tơrang dêh char Đắk Lắk, ‘nâu jĭ tơdrong tơm vă tơring yak truh tơdrong jang pơjing đei anih jang sầu riêng kơjăp ‘lơ̆ng, pơm lăp hăm tơdrong ‘mĕh vă tơ̆ tơring. Yoa thoi noh, hơnăp jang đơ̆ng anih vei lăng teh đak, kŭm hăm đon tơtăm, pơngơ̆t truh tơdrong tơproh trong jang, vei lăng kơsô̆ hơgăt tơring pơtăm, anih tăh lơ̆m tơpu, anih tơlĕch trong jang hơdoi…, dêh char tôch tơrek truh tơdrong vei lăng ‘lơ̆ng ăn tơmam.  

“Đơ̆ng găh teh đak, tơ̆ apŭng păng dêh char nhôn vă hơlen năng dôm tơmam săy phŏng, pruih pơgang lâm hlŏh tơdrong tơ̆ pơgar, kŭm nhen tơ̆ 1,2 anih jang vă pơyoa ăn tơdrong vei lăng, đei nơ̆r khan hơdrol hrôih. Veh ver tơdrong chơ truh tơ̆ tơring sơlam bơih athei chơ vih dơ̆ng. Tơdrong ‘nâu hiong răm tôch lơ, ưh lăp găh jên hu đĕch mă oei đei hloi găh bưng ai, đon lui păng lơ tơdrong nai dơ̆ng”.

Vă vei lăng ‘lơ̆ng tơdrong sơđơ̆ng lơ̆m pơyan phĕ sầu riêng, khul kơdră pơgơ̆r tơring kŭm hăm khul linh công an dôm tơring lơ̆m dêh char Đắk Lắk hlôi pơjing, tơlĕch trong tang găn tơdrong yoch păng dôm tơdrong pơm glăi lơ̆m pơyan phĕ sầu riêng sơnăm 2024. Atŭm hăm ‘nŏh hơlen năng anih mong, dăr lăng tơ̆ dôm tơring, mă loi jĭ dôm pơgar sầu riêng hơtăih kơ hnam kon pơlei, vei lăng tơdrong răt iŏk, tĕch mơdro sầu riêng, pơjing khul tơgŭm phĕ păng tĕch sầu riêng.

Đại tá Trần Quang Hiếu, Phŏ Kơdră chĕp kơ̆l Công an dêh char Đắk Lắk ăn tơbăt: “Nhôn vă kơchăng hơlen, băt hơdăh rim tơdrong, vang jang hăm dôm anih jang kơpal hơtŏk tơdrong vei lăng teh đak găh mŭk drăm, mă loi ‘nŏh ƀơm truh Kơsô̆ hơgăt tơring pơtăm, kơsô̆ hơgăt tăh lơ̆m tơpu păng dôm tơdrong đa hơlĕnh pơdăr mưh tĕch mơdro. Tơtom chă ƀôh, sek tơlang tơpăt dôm bơngai tơtông klĕ. Hơtŏk tơdrong vei lăng teh đak găh tĕch mơdro hăm teh đak đe, găh trong nơnăm, vei lăng dôm anih tĕch mơdro vă gơ̆h vei lăng kơjăp ‘lơ̆ng tơdrong sơđơ̆ng tơ̆ tơring”.

Dêh char Đắk Lắk dang ei đei vă jê̆ 33.000 hec-ta teh pơtăm sầu riêng, lơ̆m noh đei dang 16.000 hec ta đei plei, jĭ dêh char đei teh pơtăm sầu riêng xă hlŏh lơ̆m teh đak. Sơnăm 2023, sầu riêng Đắk Lắk đei plei truh 285.000 tấn păng sơnăm ‘nâu tơchĕng adrol gô đei hlŏh 300.000 tấn. Vă pơm lăp hăm tơdrong tĕch mơdro tơ̆ teh đak đe, Đắk Lắk athei hơtŏk hlŏh dơ̆ng tơdrong vei lăng, pơgơ̆r jang xa đơ̆ng 1,2 HTX, grŭp jang hơdoi; Vei lăng ‘lơ̆ng Kơsô̆ hơgăt tơring pơtăm; hơtŏk tơdrong roi tơbăt, pơhlôh đon ăn kon pơlei găh tơmam ‘lơ̆ng đơ̆ng tơm hloi.