Kiơ̆ kơ ‘noh, 9 khei ou ki, akŏp kon jên thuê̆ ăn hơnih mong jên bơ̆ jang tơ Dak Lăk đei 6.200 ti hlak jên, jơnei vă jê̆ 90% trong tơlĕch jang Trung ương pơjao, tŏk 12% pơtêng hăm dôm khei ou sơnăm 2023. Hơdrô̆ găh thuê̆ mă hơnih thuê̆ bơ̆ jang iŏk đei 94% trong pơjao. Mĭnh ƀar tơdrong iŏk đei lơ ‘noh: jên thuê̆ teh, thuê̆ vei lăng cham char, iŏk đei đơ̆ng dôm hơnih mơdro sa ŭnh hnam pơm tơm kơdih, hơnih mơdro sa đei jên teh đak đe tơmơ̆t jang. Ƀok Phạm Thanh Long, Kơ iĕng Kơdră chĕp pơgơ̆r Hơnih Thuê̆ dêh char Dak Lăk tơbăt, vă iŏk đei jơnei ou, hơnih ou hlôi tơlĕch iung jang kơtang, tang găn klĕnh thuê̆. Adoi tơlĕch lơ trong jang pơtho tơbăt trong bơ̆ jang, khôi luơ̆t thuê̆ ‘nao; jang kiơ̆ kmăi kmŏk kơtơ̆ng ang, atŏk kơtang jang kiơ̆ hơmet ming trong bơ̆ jang, tơplih kơsô̆.