Hăm tơdrong đum hrôih hloh dôm dêh char găh Tu, plei vaih kon pơlei jang mir tơ̆ Đăk Lăk tŏk bŏk oei đei tĕch hăm kơjă măt, hloh 30.000 hlj 1 kĭ tĕch tơ̆ pơgar, bơngai pơtăm xô̆ hơ-iă lơ̆m jơhngơ̆m. Jâ̆p dêh char Đăk Lăk dang ei đei jê̆ 2.600 ha vaih, lơ̆m noh pơhlom 1.400 ha tŏk bŏk oei pĕ plei, đei pơtăm tơm tơ̆ dôm apŭng Ea Kar, M’Drak, Krông Pach păng Krông Năng. Pơyan jang xơnăm 2022 – 2023 âu đei yua 14.000 tâ̆n plei.

Dang ei dôm pơgar pơtăm vaih Thiều (hơdrĕch Lục Ngạn - Bắc Giang) tơ̆ Đăk Lăk tŏk bŏk oei pĕ păng tĕch plei vaih kơluăi 1 đei 32.000 – 35.000 hlj 1 kĭ, kơluăi 2 adoi tĕch đei hloh 25.000 hlj 1 kĭ. 'Nâu jing kơjă măt ƀiơ̆ lơ̆m khei năr lơ plei 'long tơ̆ Đăk Lăk nhen pơ-ŏ, krô̆i, pơkai... tơjur kơđeh. 'Nguaih kơ tĕch đei kơjă, xơnăm âu plei vaih adoi đei lơ hăm pơhlom đơ̆ng 12 – 15 tâ̆n plei 1 ha.