Dak Lăk ‘noh dêh char đei teh pơtăm sâu riêng să hloh lơ̆m teh đak, hăm hloh 32.700 ha. Lơ̆m dêh char đei 23 hơnih tăh mong păng 68 tơring pơtăm hăm hơgăt teh să hloh 2.500 ha hlôi đei păh Trung Quốc ƀơk ăn mã kơsô̆ tĕch mơdro tơ̆ teh đak đe. Tơchĕng hơlou lơ̆m sơnăm 2024, plei sâu riêng kơ Dak Lăk iŏk đei hloh 300.000 tân.

‘Ngoăih rơvơn găh jang, tơdrong jang sâu riêng kơ Dak Lăk jei đei lơ tơdrong tim mă ‘lơ̆ng, nhen lơ tơring chă pơtăm răh rap, ưh kơ tơgoăt jang hơdoi, tĕch răt, pơm tơlĕch, vei lăng păng tĕch mơdro sâu riêng; tim mă pơm kiơ̆ kơjăp rim tơdrong tơchơ̆t vei lăng rơgoh ‘lơ̆ng mă teh đak răt iŏk pơkăp. Vă sơđơ̆ng ăn tĕch mơdro tơ̆ teh đak đe, rim kơdră tang măt tơlĕch mĭnh ƀar trong jang nhen: Pơm hơtŏk kơtang hloh dơ̆ng vei lăng, hơmet ming choh jang sa kơ minh ƀar hơp tak xah, khul jang hơdoi; Vei lăng ‘lơ̆ng mã kơsô̆ tơring pơtăm; Atŏk kơtang pơtho tơbăt ăn kon pơlei pơm kiơ̆ ‘lơ̆ng tơdrong pơkăp rơgoh ‘lơ̆ng đơ̆ng blŭng.