Lơ̆m tơdrong pơkăp Lêh akŏm ka phê Buôn Ma Thuột 'măng mă 8 xơnăm 2023 ăh pơgê  năr 10/3, tơ̆ pơlei tơm Buôn Ma Thuột Jơnŭm jang ka phê Buôn Ma Thuột pơm Lêh pơtơm tơdrong pơlong bơ̆ đak ka phê kăp gĭt Việt Nam xơnăm 2023. 'Nâu jing minh lơ̆m dôm anih hơdăh hloh kơ Lêh akŏm, tơgop pơm kiơ̆ tơchơ̆t hơ-'nhăk Buôn Ma Thuột jing anih truh kơ ka phê apŭng plenh teh.

Đei pơgơ̆r đơ̆ng năr 10 truh năr 13/3, tơdrong pơlong akŏm đei 33 'nu pơlong đơ̆ng 9 dêh char pơlei tơm lơ̆m jâ̆p teh đak, lơ̆m noh đei 24 bơngai pơlong chih măt mă tơdrong hlŏng kơtoh đak ka phê hăm Phin juăt jue păng 27 'nu pơlong chih măt pơlong bơ̆ đak ka phê Pour V60 (dang bơ̆ đak ka phê hăm kơphêu păng hla bar hlŏng). Tơdrong pơlong vă ƀôh băt, pôk hơpăh hăm dôm bơngai rơgei lơ̆m tơdrong hlŏng bơ̆ đak ka phê; Hơtŏk tơdrong bơ̆ đak ka phê jing tơmam huch nhă 'lơ̆ng hloh, pơtrŏ hăm tơdrong kăl roi năr roi kơjung đơ̆ng bơngai yua; Tơbang, tơroi, hơtŏk tơdrong jang ka phê kăp gĭt Việt Nam, joh ayŏ ka phê Việt Nam tơgop hơtŏk tơdrong yua lơ̆m teh đak păng kơjă kăp gĭt kơ tơdrong jang ka phê Việt Nam.