Tơdrong jang 1 xăh 1 tơmam roi đunh roi đei tơrĕk truh, sơng đei lơ bơngai, anih tĕch mơdro vang akŏm. ‘Măng hơlen năng chă rơih, chih tơbăt tơmam mă âu đei 30 tơmam, lơ̆m noh đei tơmam xa, đak nhă, pơgang đơ̆ng 18 anih jang ‘nŏh jĭ dôm công ty TNHH, HTX păng unh hnam tĕch mơdro tơ̆ plt Buôn Ma Thuột, apŭng Krông Pach, Krông Năng, Cư Mgar păng Krông Ana.

‘Nâu jĭ dôm tơmam đơ̆ng choh jang xa ‘lơ̆ng tơ̆ tơring, đei pơm hơmet, tăh lơ̆m tơpu, chih hơnăn, anih pơm tôch hơdăh. Truh dang ei, lơ̆m dêh char Dak Lak đei 110 tơmam OCOP đơ̆ng 3 – 4 sơ ‘nglŏng. Lơ̆m trong jang atŏk tơiung tơmam OCOP, dêh char Dak Lak adrin truh sơnăm 2025 đei 200 tơmam OCOP, sơnăm 2030 đei 300 tơmam OCOP iŏk đei hla ar hơgăt tơmam ‘lơ̆ng. Dôm tơmam pơm roi đunh roi ‘lơ̆ng, đei chơ tĕch lơ̆m păng ‘ngoăih kơ tĕh đak tôch đei yoa.