Khei ‘năr tơ jê̆ âu, lơ kon pơlei jang chŭn mir tơ̆ Dak Lak oei phă hŭt pơgar ‘long chĕh phe, tiu vă pơtăm dơ̆ng ‘long sâu riêng. Anih vei lăng choh jang xa Dak Lak tơtă ăn kon pơlei lê̆ pơih xă tĕh pơtăm sâu riêng mơ̆ng kơvă vă huei tơƀâp tơdrong krê găh tơdrong tĕch mơdro. 

Sâu riêng tŏk bŏk jing 1 lơ̆m dôm kơloăi ‘long pơtăm đei kơjă kăp, hơnhăk ăn iŏk yoa lơ hăm kon pơlei tơ̆ Dak Lak. Lơ̆m dêh char đei dang 15.100ha păng kơsô̆ âu gô tŏk tôch hrĕnh. Pơhlom năng plei sâu riêng phĕ đei lơ̆m sơnăm 2022 dang 170.000 tân păng truh sơnăm 2025 ‘nŏh hlŏh 300.000 tân. Anih vei lăng choh jang xa tơtă ăn kon pơlei lê̆ druh kiơ̆ kơjă tơmam oei tŏk mă tơgar băl pơih xă tĕh pơtăm kơplăh dang ei. Mưh kon pơlei pơih xă tĕh pơtăm sâu riêng kơdih păng ưh đei trong jang hơdoi chă pơm tơlĕch, tĕch mơdro kơna ƀônh đei tơdrong tơmam rơkăh rơkai, bơngai răt ưh kơ lơ.