- Ƀok ăi, tơgŭm kon pơlei păng anih mơdro sa răt iŏk, tĕch tơlĕch sầu riêng tơ̆ teh đak, khŭl kơdră tơring hlôi tơlĕch jang dôm trong jang thoi yơ?

Ƀok Trần Hồng Tiến: Khul chĕp kơ̆l pơgơ̆r Anih jang Đảng apŭng kŭm hlôi athei tơlĕch jang phĕ sầu riêng sơnăm ‘nâu. Hrei ‘nâu, Anih vei lăng kon pơlei apŭng hlôi pơjing dôm khŭl hơtŏk loi dơ̆ng tơdrong jang hơlen lăng; dôm anih jang nhen kŏng an, choh jang sa... hơtŏk loi dơ̆ng tơdrong jang vei sơđơ̆ng ăn pơyan sầu riêng sơnăm ‘nâu, vei sơđơ̆ng ưh kơ lê̆ đei ƀôh tơdrong dôm bơngai koh phă, phă ngơ̆r sầu riêng ‘lơ̆p ƀơm ưh kơ ‘lơ̆ng truh mŭk drăm păng đon tơchĕng lơ̆m kon pơlei.

- Mơ̆t lơ̆m pơyan phĕ tĕch, Krông Pắch gô sơng lơ bơngai jang đơ̆ng  dôm hơnih nai năm jang, mưh lei tơdrong jang vei lăng măt bơngai, vei sơđơ̆ng tơpôl đei tơring hơmet ăn thoi yơ, hă ƀok?

Ƀok Trần Hồng Tiến: Nhôn hlôi pơgơ̆r 1 Grŭp bơ̆jang kơtă tơ̆ dôm hơnih đei tơmam sầu riêng lơ kơ tơring, hơtŏk loi dơ̆ng tơdrong jang vei lăng hăm bơngai jang đơ̆ng dôm dêh char nai năm jang, vei sơđơ̆ng tơpôl, bơngai jang tơchă tơdrong jang lơ̆m tơring. Athei grŭp jang kơpal hơtŏk loi dơ̆ng tơdrong jang hơlen lăng, dăr lăng, pơtho dôm anih mơdro sa kĭ pơkăp mưh ăn kŏng nhân năm jang pơgơ̆r răt iŏk pơm tơlĕch sầu riêng, kĭ hla ar pơkăp hăm dôm ŭnh hnam kon pơlei jang chŭn mir, hơp tak xăh athei ƀlep kiơ̆ hla ar hơgăt đơ̆ng khôi luơ̆t, vă veh ver tơdrong păih răt - păih tĕch ưh kơ pơm kiơ̆ hla ar pơkăp hăm băl.

- Trong gre 26 klĕch tơring kơ apŭng Krông Pắch tôch kơ hrăt hrot, tơdra hơdrol hơnat vă pơm lăp hăm tơdrong tŏk lơ đơ̆ng gre tih chơ  sầu riêng lơ̆m pơyan phĕ. Vă veh ver tơdrong tơhlăk tơhlĭn tơ̆ trong gre, tơring hlôi tơlĕch dôm jang kiơ, hă ƀok?

Ƀok Trần Hồng Tiến: Nhôn hlôi pơjao ăn Kŏng an, Anih jang mŭk drăm - tơmam pơjing dôm tơdrong jang klăih song trong, rơih iŏk dôm hơnih vă hơmet ăn dôm gre container dơ̆ng, veh ver tơdrong athei pơ dơ̆ng tơ̆ dôm jih trong, tơ nglăng trong.... ƀơm ưh kơ ‘lơ̆ng truh trong nơnăm. Hrei ‘nâu, nhôn kŭm hlôi dăr hơlen, rơih iŏk 1,2  hơnih cham đă ƀŏng lŏng, cham pơdơ̆ng gre kơ dôm kŏng ti vă tơgŭm dôm anih jang gre tih ăn gre mơ̆t akŏm, pơvih pơvăn tơdrong răt iŏk sầu riêng đơ̆ng kon pơlei.

- Vă hơtŏk tơiung kơjăp tơdrong jang tơmam sầu riêng, tơdrong vei sơđơ̆ng ‘lơ̆ng mưh phĕ ‘noh gĭt kăl hloh. Tơdrong ‘nâu đei bơ̆jang thoi yơ, hă ƀok?

Ƀok Trần Hồng Tiến: Vă sơđơ̆ng tơdrong pơm tơlĕch sầu riêng ‘lơ̆ng, nhôn pơgơ̆r ăn pơđĭ khŭl jang chĭnh trĭ hơtŏk loi dơ̆ng tơdrong jang tơroi tơbăt, krao hơvơn kon pơlei, mưh phĕ, tĕch sầu riêng, athei đum, vei sơđơ̆ng ‘lơ̆ng, vei ƀlep ‘lơ̆ng ăn hơnăn Sầu riêng Krông Pắch, păng pơm liơ ‘noh athei vei đon lui hăm dôm anih mơdro sa.

- Lei ah, bơnê kơ ih hơ!