Jĭ mĭnh ‘nu tơdăm prăt sơnăm tơklep hăm mir, mă lei gơnơm hơdrin hŏk pơhrăm păng hơbĕch hơbal, pơnam jang sa, pơ̆n pơm kiơ̆ khoa hŏk kih thuơ̆t lơ̆m choh jang sa, ‘nhŏng K’Đức, oei tơ̆ tơring Đinh Trang Thượng, apŭng Di Linh, dêh char Lâm Đồng hlôi jing mĭnh ‘nu bơngai ‘lơ̆ng kơ pơlei păng đei pôk tơmơ̆t lơ̆m khul Đảng. Lăp đơ̆ng jing bơngai đảng viên, K’Đức roi năr roi pơm jŭk yŭk trong hơlou, hơdrin pơtho khan ăn kon pơlei tơplih ‘long pơtăm, jang ‘nhot sa kiơ̆ trong tĕch mơdro.“Jĭ bơngai đảng viên sơnăm mơlôh, lơ̆m khei năr ou ki, ba tôch hơdrin lơ̆m rim tơdrong jang kơ yuơ Khul kơdră Đảng păng kơdră chĕp pơgơ̆r tơring pơrô̆ pơjao. Lơm ou đei tơdrong yŭk trong hơlou lơ̆m choh jang sa, tơplih ‘long pơtăm hơnhăk đei iok yua kơjăp păng chă pơrô̆ hơvơn kon pơlei pơm kiơ̆. Nhen nơ̆r Ƀok Hô pơtho đảng viên pơchoh trong, kon pơlei ngyoong kiơ̆ đơ̆ng rŏng”.

Jei lei lăi, đảng viên K’Ly, oei tơ̆ tơring Tân Thượng, apŭng Di Linh jei jang ‘lơ̆ng hơnăp jang pơm jŭk yŭk trong hơlou lơ̆m choh jang sa vă kon pơlei hŏk pơhrăm păng jang kiơ̆. Đơ̆ng nar jang iŏk đei jơnei pơtăm tơƀăng tây kiơ̆ kĭ pơkăp tĕch răt, mir pơgar ƀok K’Ly hlôi jing hơnih kăl, đei lơ kon pơlei lơ̆m tơring năm lăng, hŏk pơhrăm... K’Ly tơbăt, ‘meh vă tơplih jơhngơ̆m đon jang sa kơ kon pơlei lei kăl tơƀôh hơdăh ăn đe sư ƀôh trong jang sa yă kiơ ‘noh đei iŏk yua kơjăp ‘mơ̆i kơna đe sư mă druh kiơ̆.“Vă kon pơlei jang sa đei kon jên kiơ̆ kơ năr, kơdih ba jei hơdrin yak hơdrol lơ̆m pơtăm ‘long tơƀăng tây vă iŏk hrôih rong klui, đei kon pơlei hŏk kiơ̆ păng jang kiơ̆. Dang ei tơƀăng tây chă tĕch lơ̆m 1 kĭ đơ̆ng 70.000 hlak jên truh 100.000 hlak jên, lơ bơngai mơdro sa năm truh tơ̆ mir pơgar răt iŏk mă lei ưh kơ măh chă tĕch ăn. Truh ou kơnh ba hơdrin lang să chă pơtăm vă lơ kon pơlei jang sa đei iŏk yua kơjăp, sơđơ̆ng hơrih sa”

Kiơ̆ đơ̆ng đảng viên K’Brao, Bí thư Chi ƀô̆ thôn Hàng Ùng, tơring Bảo Thuận, apŭng Di Linh, tơdrong atŏk kơtang hơnăp jang pơm jŭk yŭk trong hơlou đơ̆ng đảng viên lơ̆m choh jang sa păng hơrih sa tơ̆ rim pơlei pơla kon kông ‘noh minh lơ̆m dôm tơdrong jang kăl hloh đei Đảng Ƀô̆ apŭng Di Linh lăng ba kơjăp tơlĕch jang kiơ̆ kơtang. Kơ yuơ lơ loh, ‘meh vă tơplih jơhngơm đon tơchĕng, trong jang sa kơ kon pơlei, đảng viên lơ̆m chi ƀô̆ hơnơ̆ng chă pơma dơnuh păng pơjing rim trong jang sa trŏ lăp păng iŏk đei hơ iă. Ăp lơ loh kon pơlei mă lui păng pơm kiơ̆. “Sơ̆, kơ yuơ pơtăm chehphe ơng kơdih hăm găr kơna plei ưh kơ lơ. Đơ̆ng mă iŏk pơtăm hơdrĕch chhephe hle hơdrĕch 138 chehphe tơgep kơna hăp plei lơ hlŏh pơtêng hăm dôm chehphe so. Kon pơlei ƀôh ba jang sa đei iŏk yua kơjăp kơna năm hŏk pơhrăm păng pơm kiơ̆ vă jang sa iŏk yua kơjăp, hơrih sa sơđơ̆ng”.

Apŭng Di Linh hrei ou đei 4.400 đảng viên, lơ̆m ou đei hloh 900 ‘nu đảng viên kon kông. Dôm bơngai đảng viên ou ‘noh jĭ dôm bơngai pơm jŭk yŭk trong hơlou, ling lang yŭk trong hơlou lơ̆m rim tơdrong jang, tơgop pơm tơplih jơhngơ̆m đon tơchĕng, trong jang sa lơ̆m kon pơlei kon kông, tơgop kơtang lơ̆m atŏk tơ iung mŭk drăm tơpôl kơ apŭng Di Linh pơma hơdrô̆ păng dêh char Lâm Đồng pơma atŭm.