Ƀok Y Sanh Niê, hơdrung Êđê oei tơ̆ ƀuôn Pan, tơring Ea Yông, apŭng Krông Pach, dêh char Dak Lăk hlôi pơtăm chehphe, tiu đơ̆ng sơ̆. ‘Long tiu ngăl răm pơrang pơrăm pơm ăn plei ưh kơ trem, kơjă chă tĕch ưh sơđơ̆ng; găh chehphe ‘noh đĭ kră krŭt, pơtăm ming ‘noh kăl đei kon jên lơ adoi tơnap mă jing ‘lơ̆ng. Sơnăm 2011, ƀok Y Sanh Niê hlôi răt pơtăm hrou hăm ‘long sâu riêng lơ̆m mir pơgar chehphe. Sâu riêng pơtăm ƀônh, mă lei ưh kơbăt trong vei lăng năng tông ‘noh lôch kơ yuơ pơrang pơrăm, dăh mă plei ưh kơ lơ, ưh kơ ‘lơ̆ng. Hăm mir pơgar să 1ha 7 sao, hlôi đei 1.400 sơnơm chehphe păng hloh 400 dơnơm tiu, ƀok Y Sanh Niê pơtăm hrou dơ̆ng 130 dơnơm sâu riêng hơdrĕch Dono. Mưh sâu riêng tih ‘noh pơjing đei hơdrai tơ̆ kơpal, bing yơ̆p rơngơp ăn chehphe. Dôm sơnăm tơjê̆ ou hơnơ̆ng phĕ tĕch đei 10 tân sâu riêng, 2 tân chehphe, 1 tân 5 tă tiu. Ƀok Y Sanh Niê tơbăt, lăp đơ̆ng rŏng tơklăh pơđĭ kon jên răt phŏng, pơgang vei lăng ‘long pơtăm, mĭnh sơnăm ŭnh hnam jang sa iŏk đei vă jê̆ 1 ti hlak jên. “ ‘Măng blŭng ba ưh kơ chă pơtăm ngăl sâu riêng, ba jei ưh kơ koh hŭt chehphe, tiu, ba lăp pơtăm hrou đĕch. Mĭnh sơnăm chehphe phĕ đei 1 tân 5 tă, sơnăm ou ‘noh 2 tân. Lăp đơ̆ng rŏng tơklăh pơđĭ kon jên tơmơ̆t jang ‘noh ŭnh hnam jang sa akŏp đĭ đăng iŏk đei  500-600 triu hlak jên.”

Ƀok Y Mi Êban oei tơ̆ pơlei Ea K’măt, tơring Hoà Đông, apŭng Kông Pach jei pơtăm tiu hrou lơ̆m pơgar chehphe. Lơ̆m mă khei năr đe chă pơtăm sâu riêng lơ, ƀok Y Mi Êban hlôi răt 40 sơnơm sâu riêng Dona chă pơtăm hrou lơ̆m mir pơgar. Jei rơ̆ih iŏk trong pơtăm hrou lơ̆m mir pơgar chehphe păng tiu. Dang ei ƀok hlôi pơtăm đei truh 120 sơnơm sâu riêng, vei kơjăp 900 dơnơm chehphe păng 200 dơnơm tiu lơ̆m mir să 1ha 4 sao. Ƀok Y Mi Êban tơbăt, mir pơgar chă pơtăm hrou ou hlôi hơnhăk ăn đei iŏk yua vă jê̆ 1 ti 500 triu hlak jên lơ̆m mĭnh sơnăm.“Jĭ bơngai đảng viên ba kăl pơm jŭk yŭk trong hơlou vă kon pơlei kiơ̆ yok rok jơ̆ng, ba hơdrin chă pơtăm hrou bơ̆n sâu riêng, tiu, chehphe, tơdăh lăp chă pơtăm hơdrô̆ chehphe lei ưh kơ gan sơđơ̆ng, sâu riêng sơnăm ou phĕ tĕch đei 10 tân, kiơ̆ kơjă dang ei ‘noh rŏ năng iŏk đei 1 ti 200 triu hlak jên.”

‘Ngoăih pơm pơdrŏng ăn kơdih ŭnh hnam, ƀok Y Sanh Niê hăm Y Mi Êban ling lang drơ̆ng nơ̆r chă tơgŭm kon pơlei găh kih thuơ̆t vei lăng năng tông ‘long pơtăm, kon jên jang, hơdrĕch ‘long pơtăm, yŏng kon tơrong ... vă atŏk tơ iung mŭk drăm, sut sa pơngot rơvĕt tơjur dơnuh. Ƀok Y Niêm Niê – Kơdră chĕp pơgơ̆r Hơnih vei lăng Choh jang sa păng Atŏk tơ iung Tơring tơrang apŭng Krông Pach tơbăt, ƀok Y Sanh Niê hăm Y Mi Êban jei dôm bơngai đảng viên yŭk trong hơlou lơ̆m atŏk tơ iung mŭk drăm sut sa pơngot rơvĕt tơjur dơnuh. “Lơ̆m apŭng Krông Pach đei lơ đảng viên jang sa hơgei, lơ̆m ou đei ƀok Y Sanh oei tơ̆ tơring Ea Yông păng ƀok Y Mi oei tơ̆ tơring Hoà Đông. Lơ̆m rim ‘măng pơgơ̆r pơtho pơhrăm kih thuơ̆t choh jang sa ăn kon pơlei kon kông, nhôn hơnơ̆ng pơtho tơbăt rim trong jang ou đơ̆ng đe mih ma ‘nou vă kon pơlei hŏk pơhrăm jang kiơ̆, vang atŏk tơ iung mŭk drăm sut sa pơngot rơvĕt tơjur dơnuh.” 

Tơdrong hơdrin chă pơtăm hrou ‘long sâu riêng lơ̆m mir pơgar chehphe, tiu nhen rim ŭnh hnam ƀok Y Sanh Niê păng Y Mi Êban oei tơ̆ apŭng Krông Pach hlôi pơm hơtŏk jang sa đei iŏk yua kơjăp ăn ŭnh hnam. Đe sư ưh khan lăp yak hloh dơnuh hin kơjăp ‘lơ̆ng mă lei oei jing hơnih jang sa đei iŏk yua kơjăp ‘lơ̆ng hơ iă vă kon pơlei lơ̆m pơlei pơla hŏk pơhrăm jang kiơ̆.