‘Nâu jĭ nơ̆r sơ kơ̆t hơdăh păng tơlĕch đơ̆ng Anih vei lăng kon pơlei dêh char Gia Lai lơ̆m jơ bơ̆jang hăm Anih tơm vei lăng găh Choh jang sa păng Hơtŏk tơiung tơring tơrang blŭng khei 8/2024 âu ki. Anih vei lăng kon pơlei dêh char Gia Lai băt hơdăh, tơdrong tơmơ̆t jên jang ming man bơnơ̆ đak blai ‘noh kăl hloh, yua kơ đơ̆ng sơnăm 2012 ƀơ̆t Hnam kơmăy đak ŭnh điên An Khê Kang Nák tơmơ̆t lơ̆m bơ̆jang, đak krong Ba đei tơplih tơ̆ đak krong Kôn ro jur tơ̆ Bình Định, pơm ăn lơ hơgăt teh choh jang sa tơ̆ An Khê đei ưh kơ măh đak.

Đak ro klĕch thị xã An Khê oei tam mă truh 4m3 lơ̆m 1 giây, lơ̆m pơyan tŏ ‘noh hrơ̆, 1,2 hơnih đak tơ̆ng ‘noh đei ‘mê̆ ‘mach. Ƀok Đặng Quốc Hoài Huy- Phŏ Kơdră Anih vei lăng kon pơlei thị xã An Khê pơma hơdăh, tơdrong ưh kơ măh đak, ‘mê̆ ‘mach cham char gô đei hơmet pơ ‘lơ̆ng tơdăh bơnơ̆ găn đak tơ̆ đak krong Ba jăh đei ming man.