Kiơ̆ trong tơgŭm hơdrol tơdrong jang tơmơ̆t yua kơmăy kơmŏk ‘nao, tih păng vei lăng cham char. Kiơ̆ kơ Anih tơlĕch nơ̆r sơkơ̆t tơmơ̆t jên jang dêh char Gia Lai, tơring dăr hơlen păng hơmet ming trong sơng iŏk tơmơ̆t jên jang yua kơ kiơ̆ hơlen lăng, dăr lăng 16 tơdrong jang vei rong kon tơrong tŏk bŏk bơ̆jang, anih jang chă ƀôh lơ tơdrong jang ưh kơ ‘lơ̆ng.

Anih vei lăng kon pơlei dêh char Gia Lai hlôi đei hla ar athei Anih tơlĕch nơ̆r sơkơ̆t păng tơmơ̆t jên jang jang hơdai hăm dôm anih jang tơring hơnơ̆ng pơtho dôm tơ ‘ngla tơmơ̆t jên jang pơm đang hla ar kiơ̆ tơdrong hơgăt; bơ̆jang dôm tơdrong hơgăt găh vei lăng cham char; hơlen lăng, dăr lăng; tơgŭm hơdrol tơmơ̆t jên jang dôm tơdrong jang vei rong kon tơrong tơmơ̆t yua kơmăy kơmŏk. Mưh chă ƀôh đei glăi ‘noh tơtom sek phak tơpăt, jô̆ hloi tơdrong apĭnh Anih vei lăng kon pơlei dêh char ăn pơdơh kơ bơ̆jang kiơ̆ ƀlep tơdrong hơgăt đơ̆ng khôi luơ̆t.