Jăl jang 2017 - 2022, jô̆ hơtŏ lơ̆m sơnăm dêh char đei 63.000 ŭnh hnam jang sa mơdro sa hơgei, lơ̆m au đei 297 ŭnh hnam kon pơlei jang sa mơdro sa hơgei găh lơ̆m Trung ương. Rim ŭnh hnam au pơjing đei tơdrong jang ăn kon pơlei hlŏh 320.000 ‘nu bơngai jang, lơ̆m 1 khei jang sa iŏk đei đơ̆ng 4,5 trŭh 6 trĭu hlak jên.

Rim ŭnh hnam jang sa mơdro sa hơgei tơ̆ Gia Lai jei tơgop kơtang lơ̆m hơmet pơ ‘lơ̆ng ‘long pơtăm, yŏng kon tơrong, jang kiơ̆ khŭh thuơ̆t lơ̆m chŏh pơtăm, rong kon tơrong, tưk hơtŏk jơhngơ̆m yak hlŏh dơnŭh hin, hơdrin pơm pơdrŏng; vang tơ iung pơjing tơring tơrang ‘nao. Jăl jang 2022 -2027, rim khŭl sơkơ̆t hơdăh hơnơ̆ng lang să, atŏk kơtang tơdrong jang roi năr roi kơtang hlŏh dơ̆ng, jơnei hlŏh dơ̆ng. Ƀlep lơ̆m jơ ‘năr au, Dơnŏ anĭh vei lăng kon pơlei dêh char Gia Lai pôk bơnê ăn 18 khŭl, 94 ‘nu bơngai; Khŭl kon pơlei chŏh jang sa dêh char pôk bơnê ăn 17 khŭl păng 42 ‘nu bơngai ‘lơ̆ng lơ̆m tơdrong jang kon pơlei pơting dĭh băl chŏh jang sa, mơdro sa hơgei jăl jang 2017 – 2022.