Kiơ̆ kơ Anih pơtrŭt choh jang sa teh đak, tơdrong jang pơlong lăng “ Hơtŏk ‘lơ̆ng đei yua tơdrong jang pơtrŭt choh jang sa kiơ̆ lơ̆m hơmet tôm tơdrong jang grŭp pơtrŭt choh jang sa tơpôl” đei anih jang bơ̆jang kiơ̆ sơnăm 2021, tơ̆ 13 dêh char găh 5 tơring tơmam. Pơtôch, hlôi pơjing đei 26 grŭp pơtrŭt choh jang sa tơpôl, lơ̆m noh đei 8 grŭp tơ̆ Tây Nguyên. Đơ̆ng rŏng vă jê̆ 1 sơnăm bơ̆jang, dôm grŭp pơtrŭt choh jang sa tơpôl hlôi hơtŏk đei hơnăp jang đơ̆ng kơdih lơ̆m pơjing tơring tơmam cheh phe kơjăp, pơtho tơdrong hlôh vao khoa hŏk ki thuơ̆t, kơmăy kơmŏk truh hăm kon pơlei jang chŭn mir, vang jang lơ̆m pơgơ̆r dơ̆ng pơm tơlĕch, tơmơ̆t dơ̆ng tơdrong hlôh vao mŭk drăm tĕch mơdro tơplih yua kơ lăng truh choh jang sa.

Dôm bơngai tang măt hlôi tơlĕch 1,2 trong jang vă hơtŏk ‘lơ̆ng iŏk yua tơdrong jang đơ̆ng grŭp, nhen hơtŏk loi dơ̆ng lơ̆m pơtôl bơ̆jang pơtrŭt choh jang sa, Anih pơtrŭt choh jang sa teh đak hơnơ̆ng pơgơ̆r dôm lăm pơhrăm hơtŏk ‘lơ̆ng  kĕ jang ăn dôm bơngai jang lơ̆m grŭp pơtrŭt choh jang sa tơpôl, mă loi ‘noh jĭ găh dôm tơdrong đei ƀơm truh mŭk drăm tơpôl, hơtŏk tơiung hơp tak xăh, jang hơdai kơjă păng tơplih kơ sô̆.