Kơtao răm kơ ŭnh sa ưh khan lăp pơm pơrăm kon pơlei choh jang sa mă lei oei pơm kơnê̆ truh trong vă răt iŏk, pơm tơlĕch kơ hơnih mơdro sa.

Dang ei rim tơring tŏk bŏk iung jang hơdoi hăm hơnih mơdro sa păng kon pơlei tŏk bŏk tơlĕch lơ trong jang tang găn ŭnh sa, tĕnh koăng koh kơtao tơgŭm ăn kon pơlei dă ƀiơ̆ hiong răm lơ. Kiơ̆ đơ̆ng Công ty Thành Thành Công Gia Lai, đơ̆ng rŏng Têt Nguyên đán, tơdrong ŭnh sa kơtao kơ hơnih au tôch kơtang, pơm kơnê̆ truh tơdrong pơm tơlĕch. Truh dang ei, hlôi đei 30 ‘măng ŭnh sa kơtao truh hloh 270 ha, să hloh 5 ‘măng pơtêng hăm pơyan hơdrol. Ƀok Trương Quang Trình, Kơ iĕng kơdră chĕp pơgơ̆r Công ty tơbăt, tơ̆ hơnăp tơdrong unh sa kơtao, hnam kmăi hlôi tơlĕch jang răt iŏk hrôih, hơmet pơ ‘lơ̆ng khul jang vă kon pơlei dă ƀiơ̆ tơtăm.