Vă hơtŏk tơiung kơjăp, Anih tơm vei lăng găh choh jang sa păng hơtŏk tơiung tơring tơrang hlôi kĭ ăn Tơdrong jang hơtŏk tơiung ‘long sa plei tơm truh sơnăm 2025 păng 2030. Lơ̆m noh, hơdrin truh sơnăm 2025 lơ̆m teh đak đe đei 1,2 triệu hek tar ‘long sa plei, tơmam iŏk đei 14 triệu tấn. 30% hơgăt teh athei iŏk yua trong choh jang sa ‘lơ̆ng, kơjă tĕch tơ̆ teh đak đei 5 ti USD. Hop akŏm hlôi tơblang hơdăh, tơlĕch ăn dôm trong jang, trong vă jang hăm tơdrong hơtŏk tơiung sầu riêng păng gui yuăn tơ̆ hơnăp kơnh tơklep hăm anih tĕch mơdro lơ̆m teh đak, lơ̆m tơring păng apŭng plĕnh teh.

Hăm dôm anih mơdro sa tĕch tơ̆ teh đak đe, Anih jang tơchĕng hơlen, păng dôm tơring găh pơbăh athei bơ̆jang kiơ̆ trong jang hơdai vă hơtŏk tơiung kơjăp ‘long sa plei. Vei lăng ‘lơ̆ng găh hơdrĕch, veh ver lê̆ kon pơlei jang chŭn mir, bơngai pơtăm đei hiong răm. Anih vei lăng ‘long pơtăm kŭm pơtho tơtă tơdrong tŏk hrĕnh găh teh, tơmam găh gui yuăn păng mă loi ‘noh jĭ hăm ‘long sầu riêng, đei hơmơt ƀơm ưh kơ truh trong tơlĕch jang pơm tơlĕch, hơmet ming ‘long pơtăm kiơ̆ tơdrong jang hơmet ming choh jang sa kơ tơring. Ƀơ̆t lăp, đei tơdrong kon pơlei koh hŭt ‘long đunh sơnăm nai nhen cheh phe, tiu... jing pơtăm sầu riêng, gui yuăn.