Đơ̆ng sơnăm 2017 truh dang ei, Anih Wasi păng Công ty pơm phŏng Bình Điền jang đei 23 tơdrong tơchĕng hơlen păng 28 trong jang pơlong năng găh tơdrong jang xa kơjăp ‘lơ̆ng, iŏk yoa ‘lơ̆ng phŏng, ‘măn ăn 5 kơ loăi ‘long pơtăm tơm kơ Tây Nguyên đei: cheh phe, tiu, sầu riêng, ƀơ, ‘nhot păng hơƀo. Kiơ̆ đơ̆ng trong jang pơlong năng, kon pơlei hlôh vao, băt hơdăh trong choh jang xa ‘mơ ‘met, ‘lơ̆ng hăm cham char. Kiơ̆ đơ̆ng nŏh, tơgop pơm hơtŏk iŏk yoa găh mŭk drăm, jang kiơ̆ lơ tơdrong tơchĕng hơlen păng roi tơƀôh dôm tơdrong tơchĕng hơlen đei đơ̆ng Anih Wasi ăn kon pơlei jang chŭn mir…

Tơ̆ hop akŏm, Anih Wasi, Công ty pơm phŏng Bình Điền, Anih pơtrŭt choh jang xa kơ tĕh đak kĭ pơkăp jang hơdoi atŏk tơiung “Tơdrong jang Chĕh phe rơgei ‘moi kiơ̆ tŏ ‘mi kial tơplih tơ̆ tơring Tây Nguyên” truh sơnăm 2025. Tơdrong tơm ‘nŏh pơtho đei tŏ sĕt hlŏh ‘nŏh 1.000 ‘nu bơngai jang chŭn mir tơ̆ 1 dêh char lơ̆m tơring Tây Nguyên găh tơdrong jang chĕh phe kơ jăp ‘lơ̆ng; pơjing đei trong jang chĕh phe rơgei vă bơ̆ jang kiơ̆ tơ̆ rim dêh char; Tơchĕng hơlen, atŏk tơiung trong pơm phŏng lăp hăm tĕh, tơgop ăn tơdrong jang chĕh phe kơjăp, hơtŏk kơjă tơmam, hơtŏk iŏk yoa ăn kon pơlei păng anih jang chĕh phe.